Búgin, 7 sáýirde Aqorda rezıdensııasynda Memleket basshysy Qasym-Jomart Toqaevtyń atynan aýyzashar berildi, dep habarlaıdy Egemen.kz.
Aýyzasharǵa memleket jáne qoǵam qaıratkerleri, ǵalymdar, dárigerler men muǵalimder, etnomádenı birlestikterdiń ókilderi, dıplomatııalyq ókildikterdiń basshylary, mádenıet qaıratkerleri, qutqarýshylar men eńbek adamdary shaqyryldy.
«Barshańyzdy qasıetti Ramazan aıymen quttyqtaımyn. Oraza qabyl bolsyn! Ramazan aıy – kúlli musylman qaýymy úshin erekshe ýaqyt. Jamaǵat osy aıda izgi amaldar jasap, mol saýapqa keneledi. Biz byltyr Aqordada alǵash ret arnaıy dastarqan jaıyp, aýyzashar berdik. Bul bastama óz jalǵasyn tabýda. Búgin meniń atymnan árbir oblysta jurtshylyqqa aýyzashar berilip jatyr», dedi Prezıdent aýyzashar barysynda.
Memleket basshysy sondaı-aq elimizde júrgizilip jatqan saıası reformalarǵa jáne olardyń qoǵamdaǵy mańyzyna toqtala ketti.
«Qazaqstan – óz geosaıası aımaǵynda aýqymdy reformalar jasap jatqan birden-bir el. Jańartylǵan Konstıtýsııa jáne elimizde bolyp jatqan ózgerister – osynyń aıqyn dáleli. Biz osy reformalardy, jalpy aıtqanda, osy saıasatty mindetti túrde jalǵastyramyz. Aldymyzda turǵan negizgi maqsat – egemendigimizdi nyǵaıtý jáne ulttyq múddemizdi qamtamasyz etý», dedi Qasym-Jomart Toqaev óz sózinde.
Prezıdenttiń aıtýynsha, Qazaqstan halyqaralyq yntymaqtastyqty belsendi túrde jalǵastyra beredi, al eldiń syrtqy saıasaty árdaıym derbes bolady.
«Biz munyń bárine myzǵymas birliktiń arqasynda qol jetkizip otyrmyz. Qandaı qıyn bolsa da, bul joldan taımaýymyz kerek. Alǵa qaraı qadam bassaq qana, jolymyz ashyq bolady. Osylaısha, Qazaqstan, shyn máninde, órkenıetti, jasampaz jáne ozyq el bolmaq», dep túıindedi Qasym-Jomart Kemeluly.