2017 jylǵy naýryzdyń 23-inde alǵash ret Jezqazǵan – Qyzylorda poıyzy jolǵa shyqty. Sol jolǵy estigen áńgime esimnen ketpeıdi. Jol-jónekeı mingen jolaýshylardyń biri vagon sypyrýshy kelinshekti tanıdy eken, áńgimelesip otyrdy.
– Jezqazǵandy aralap kórdiń be? Qandaı qala eken ózi? – dedi jolaı mingen jolaýshy. Shamasy, Jezqazǵanda bolyp kórmegen kisi sekildi. Áıtpese, mundaı suraq qoımasa kerek-ti.
– Apa-aý, nesin suraısyz? Keshegi Keńes ókimeti kezindegi Qyzylorda esińizde me, qazirgi Jezqazǵan tap sondaı, degen jaýapty estigen apamyz: – Alda obaldaǵy-aı, túk óspeı qalǵan jer eken ǵoı, – dep kúrsingendeı bolǵan edi.
Keńes kezinde de jarqyrap kete qoıǵany shamaly Jezqazǵan 1997 jyly oblys ortalyǵy mártebesinen aırylǵan soń quldyraǵan ústine quldyraı túskeni ras.
Ulytaý oblysy qurylyp, ortalyǵy Jezqazǵan qalasy bolyp bekitilgeli de jyldan asyp barady.
Sársenbide oblys ákimi Berik Ábdiǵalıuly qala aktıvi qatysqan Jezqazǵan qalasyn damytý jóninde arnaıy jıyn ótkizdi. Jıyndy ashqan ákim qalanyń qazirgi jaı-kúıi oblys ortalyǵy mártebesine múldem saı kelmeıtinin ashyq aıtty.
– Úkimette bekitilgen oblys ortalyǵy degen normatıv bar. Biz sol normatıvke laıyq bolýymyz kerek. Byltyrdan beri jobalar qarastyrdyq, josparlar jasadyq. Endi iske kiresetin sát týdy, – degen B.Ábdiǵalıuly Jezqazǵan qalasyn damytý josparymen tanystyrdy. Munda kóptegen is-sharalar kózdelgen eken. Aıtalyq, qalaishilik joldardy jóndeý, jaqsartýǵa 3,1 mlrd teńge qarastyrylǵan. Al 1 mlrd 744 mln teńgege balalardyń oıyn alańdary salynady. Qalany kógaldandyrýǵa 300 mln teńgeden astam qarjy qarastyrylǵan. Turǵyn úılerdiń qasbetterin jańartyp, tóbelerin jóndeý jumystary úshin 1,1 mlrd teńge, 26 sport alańyn jóndeýden ótkizý maqsatynda 660 mln teńge bólinedi. 29 jańa zamanaýı aıaldama ornatý da qajet. Bulardyń syrtynda jańadan turǵyn úıler, ákimshilik ǵımarattar salý da qolǵa alynady. Jıynda «Qazaqmys» korporasııanyń el Prezıdentiniń tapsyrmasy boıynsha Sport keshenin salýdy bastap ketkeni de aıtyldy. Budan da basqa birneshe iri jobalar josparlanýda. «Qazaqmys» korporasııasy tarapynan birshama jumystar atqarylmaqshy eken. Jıyn qorytyndysynda oblys ákimi korporasııa basshylyǵyna alǵysyn bildirdi.
Qalaı bolǵanda da oıǵa alǵannyń oryndalǵany jaqsy. Jezqazǵandy jańartý jobasy jurtshylyqtyń kóńilinen shyǵady dep senemiz!
Abdolla DASTANOV,
jýrnalıst
Jezqazǵan qalasy