Jeksenbi kúni polıseıler Oral qalasyndaǵy Shaǵan sý qoımasy beketi mańyndaǵy kópirden sekirmek bolǵan jas kelinshekti qutqaryp qaldy, dep habarlaıdy Egemen.kz.
Ádettegideı ózderiniń kezekshilik mindetin atqaryp júrgen oblystyq mamandandyrylǵan kúzet qyzmeti basqarmasy memlekettik mekemesiniń 2 polısııa batalonynyń polısııa aǵa serjanttary — Nurbol Janǵalıev pen Arman Orynbasarov saǵat 11:30 shamasynda beınebaqylaý kamerasy arqyly belgisiz azamatshanyń kópirdiń astymen ótip bara jatqanyn baıqap qalady.
Kameradan kórinbeı qalǵan azamatshany izdegen polıseıler kópirdiń astyńǵy jaǵyna shyǵady.
Sol mezette jas kelinshektiń kópirden sekireıin dep jatqanyn baıqap, bireýi aldyńǵy jaqtan shyǵyp, «sekirme!» dep aıqaılap, toqtatýǵa tyrysady.
Ekinshisi kópirdiń astynan shyǵyp, azamatshany qutqaryp qalady. «Jalpy sý erip, muz ketken soń osyndaı oqys oqıǵalardyń jıileıtinin baıqap júrmiz. Bıyl birinshi ret oryn alyp tur. Biz oqys oqıǵa jaıly oblystyq polısııa departamentindegi kezekshi bólimge baıandap, sýısıd jasamaq bolǵan azamatshany aman-esen Abaı polısııa bólimine tapsyrdyq. Bizdiń jigitter ómirmen qoshtaspaq bolyp, qamyqqan jandardy budan buryn da birneshe ret qutqarǵan. Bul - bizdiń jumysymyz», deıdi polısııa kapıtany Baqjarat Makarov.