Jetisýda byltyr 16 bilim berý nysanynyń qurylysy júrgizilgen. Onyń ishinde 2 050 oryndyq 6 bilim oshaǵy iske qosyldy. Sondaı-aq 58 mektep jańǵyrtylyp, 7-eýi kúrdeli jóndeýden ótti. Qazir oblys ortalyǵynda jańa mektepter ashylyp jatyr. Búginde bilim salasynyń mamandary óńir boıynsha balalardy 1-synypqa qabyldaýdy bastady.
Balalardy 1-synypqa tirkeý 1 sáýirden 1 tamyzǵa deıin jalǵasady. О́tinimdi egov.kz portaly arqyly onlaın berýge bolady. Ata-analardyń ótinishi boıynsha qujattardy dástúrli qaǵaz túrinde de ótkizýge bolady.
Sáýir aıynyń alǵashqy aptasynda Jetisý oblysy boıynsha 1-synypqa qabyldaý týraly 352 ótinish kelip túsken. Onyń 278-i oblys ortalyǵy Taldyqorǵan qalasynyń turǵyndarynan kelgen. Oblystyq bilim basqarmasy orta bilim berýdi damytý, qorǵanshylyq jáne qamqorshylyq, tárbıe jumysy bóliminiń basshysy Roza Turǵanbaevanyń aıtýynsha, bıyl oqýshy sany byltyrǵydan kóp bolmaq.
– Jetisý oblysy boıynsha qujattardy qabyldaý e-zhetysu.kz elektrondy qyzmet kórsetý portaly arqyly júzege asyrylady. Ata-analarǵa qujattardy elektrondy qyzmet kórsetý portaly arqyly ótkizý úshin oblystyń barlyq bilim berý mekemesinde ınternet jelisine qosylǵan ózine-ózi qyzmet kórsetý orny uıymdastyrylǵan. Bul jerde elektrondy sıfrlyq qoltańba alýǵa, qujattardy portalǵa engizýge bilim berý mekemeleri tarapynan praktıkalyq kómek kórsetiledi, – deıdi R.Turǵanbaeva.
Bólim basshysynyń aıtýynsha, bos oryn bolǵan jaǵdaıda balanyń ata-anasy nemese ózge de zańdy ókilderi oqytý úshin kez kelgen bilim berý uıymdaryn tańdaýǵa quqyǵy bar. Qalalyq jerlerde mektepke eń aldymen turǵylyqty meken-jaıy boıynsha qabyldanady. Eger bos oryn bolǵan jaǵdaıda ata-ana bilim berý mekemesin tańdaı alady.
Bala jalpy bilim beretin mektepterde qabyldaý úshin emtıhan nemese testileý ótkizilmeıdi, al gımnazııa men lıseılerge qabyldaý konkýrstyq negizde júzege asyrylady. «Jalpy bilim beretin mektepke qabyldaý úshin 4 qujat jınaý qajet. Bular – ótinish, týý týraly kýáliktiń kóshirmesi, balanyń densaýlyǵy týraly qujattar jáne 3h4 ólshemdi eki fotosýret», dep naqtylady R.Turǵanbaeva.
Aıta keteıik, Jetisý oblysy boıynsha 339 jalpy bilim beretin mektepte 2022-2023 oqý jylynda 128 758 oqýshy bilim alyp jatyr. Onyń ishinde, ótken oqý jylynda 1-synypqa 13 758 bala qabyldanǵan. Jańa 2023-2024 oqý jylynda 1-synypqa 14 myńǵa jýyq balany qabyldaý josparlanyp otyr.
Sonymen qatar bıyl beıimdelgen mektepterdiń ornyna 420 oryndy úsh mekteptiń jáne «Jaıly mektep» ulttyq jobasy aıasynda 1 800 oryndy eki mekteptiń qurylysy bastalady. Atap aıtsaq, atalǵan nysandar Alakól aýdanyna qarasty Dostyq aýylynda jáne Jarkent qalasynda salynady.
Jetisý oblysy