Ǵylym degen shynymen de «ınemen qudyq qazǵandaı». Ǵylym joly – aýyr ári qaýip-qaterli jol. Erinbeı, jalyqpaı jumys isteý kerek. Ǵylym degen – eńbek. Biraq ǵylymǵa degen adamnyń eń bastysy tabıǵatynan, bolmysynan yntacy bolýy kerek.
Qazir elimizde ulttyq zertteý ýnıversıtetterin qurýǵa jol ashyldy. L.N.Gýmılev atyndaǵy Eýrazııa ulttyq ýnıversıteti zertteý ýnıversıteti mártebesin aldy. Ulttyq ýnıversıtet aldaǵy ýaqytta qalaı damýy tıis? Arnaıy maqsatty baǵdarlama boıynsha damýy kerek? О́te joǵary deńgeıde ǵylymı-zertteý júrgizýi jáne olardyń nátıjesin praktıkaǵa engizýdi qamtamasyz etýi qajet.
Joǵary oqý oryndary jumysynyń tıimdiligi olardyń talapker tartýymen ǵana sıpattalmaıdy, oqý úderisiniń sapalylyǵy, ádistemelik, ǵylymı, halyqaralyq, jańashyl jáne bıznes salasyna qatysýy da bilim ordasyna syn. Bilim ordalarynyń ınnovasııalyq deńgeıin arttyrýy, olardyń óndiristik kásiporyndarmen baılanysyn kúsheıtýi, eńbek resýrstaryn basqarý saıasatyn jetildirýi onyń menedjmentine zamanaýı kózqarasty talap etedi. Ǵylymdy, ınnovasııany, kásipkerlikti damytý el ekonomıkasyn arttyrýdyń tegershigi desek, bul barysta L.N.Gýmılev atyndaǵy Eýrazııa ulttyq ýnıversıtetiniń alar orny erekshe.
Qazaqstandaǵy ulttyq zertteý ýnıversıtetteri qazir joǵary oqý oryndary bazasynda qalyptastyrylady. Stýdentterdi ınnovasııalyq jobalaýǵa, ashylǵan ǵylymı jańalyqtardy kommersııalandyrýǵa úıretý, alǵa qoıǵan maqsattarǵa sáıkes basqarýdy uıymdastyrýdyń jańa júıesin qurý ár zertteý ýnıversıtetteriniń negizgi maqsattary men mindetterine jatady.
Ulttyq zertteý ýnıversıtetiniń túlegi taldaýdy, jobalaýdy jáne ony júzege asyrýdy qajet etetin kásibı jaǵdaılarda júıeli is-áreketke daıyn bola alatyn, kreatıvti, shyǵarmashylyqpen jumys isteýge qabiletti, boıynda oılaý shapshańdyǵy bar, qajet bolǵanda tez sheshim qabyldaýǵa tıis.
Halyqaralyq tájirıbeler kórsetkendeı, qazir zertteý qyzmetteriniń kommersııalyq baǵyt alýy joǵary oqý oryndarynyń kásipkerlik qyzmetterin júzege asyrýdyń keń taralǵan tetigi. Tehnologııalardyń kommersııalandyrylýy dep ǵylymı-zertteýdiń nátıjelerin paıdalanyp, tabys tabýǵa baǵyttalǵan kez kelgen qyzmet túri aıtylady. Búginde ınnovasııalyq kásipkerlik qyzmetti joǵary oqý oryndarynyń ýaqyt aǵymyna ilesýi ǵana emes, ony adam resýrstary – ǵalymdar men kásipkerler dep túsingenimiz abzal.
Sondaı-aq qazaqstandyq joǵary oqý oryndaryn ınstıtýttyq avtonomııa alýynyń bolashaǵy turǵysynan alǵanda, olardyń ınnovasııalyq kásipkerlik qyzmetti júzege asyrý, endaýment-qorlar, ortalyqtar qurý men damytý arqyly tapqan tabysty ártaraptandyrýǵa degen qulshynysy baıqalady.
Ýnıversıtet pen bıznes arasynda nátıjeli baılanysty damytýǵa kúsh salý, tehnologııa transferiniń damýyna, qosymsha bilim berýge, joǵary suranysty túlekterdi daıarlaýǵa erekshe nazar aýdarý ulttyq zertteý ýnıversıtetteriniń strategııalyq maqsaty bolýǵa tıis. Bolashaqta belsendi ınnovasııalyq maman-zertteýshilerdi oqytyp, teorııa men praktıkanyń ózara qarym-qatynasyna orta qalyptastyrý ulttyq zertteý ýnıversıtetteriniń basqa joǵary oqý oryndarynan basymdyǵyn anyqtaıdy. Ulttyq zertteý ýnıversıtetteri ǵylymnyń kadrlyq áleýetiniń, oqý úderisi men ǵylymı qyzmettiń, joǵary tehnologııalar men kásibı bilim berýdiń damýy men qorǵalýyna degen jaýapkershilikti ózine alýǵa qabiletti bolady. Bul olardyń qyzmetiniń barlyq negizgi parametrlerine joǵary talaptar qoıýdy qajet etedi .
Eýrazııa ulttyq ýnıversıtetinde jaqsy ǵalymdar jumys istedi jáne búgin de istep kele jatyr. Sodan keıin bizde myqty jastar bar, bakalavr, magıstr, doktorant degendeı. Olardy qazaq eliniń bolashaǵy, keleshegi dep esepteımin.
Ǵarıfolla ESIM,
Memlekettik syılyqtyń laýreaty, akademık