Ajal ákelgen avtobýs

Polısııa departamentiniń jedel-tergeý toby júrgizýshiniń sońǵy aıaldamadan qarsy baǵytqa burylyp, avtobýsty qol tejegishine qaldyryp, kólikten shyǵyp ketkenin anyqtady. Oqıǵa bolǵan jerde anyqtaýshy­lar men krımınalıster jumys istep jatyr. Qazir bul oqıǵa boıynsha Qylmystyq kodekstiń 345-babymen sotqa deıingi tergeý bastalyp, avtobýstyń jumysqa jaramdylyǵyn tekserý úshin avtotehnıkalyq saraptama taǵaıyndaldy. Al qoǵamdyq kólik júrgizýshisi ýaqytsha tergeý ızolıatoryna qamaldy.

Osy oqıǵadan keıin ertesine ta­ńerteń shahardaǵy «Dıspetcherlik qyzmet ortalyǵynda» jolaýshy tasy­maldaýshy kompanııa basshy­lary­nyń qatysýymen shuǵyl jıyn ótti. О́z kezeginde qalalyq jolaý­shy­lar kóligi jáne avtomobıl jol­dary basqarmasynyń basshy­sy Muhtar Qoqanbaev qaza bol­ǵan azamattardyń týystaryna kó­ńil aıtatynyn jetkizdi. Ol oqıǵa­nyń bolýyna adamı faktor áser etkenin málimdedi. Sondyqtan jo­laýshy tasymaldaýshy 10 kompa­nııada qaýipsizdik talaptary kú­sheı­­­tiletinin jáne reıdtik is-sha­ra­lar uıymdastyrylatynyn baıan­da­dy. Al «TBus» tasymaldaý­shy kom­panııasynyń basshysy Ábdibek Úkibaev qoıylyp otyrǵan talapty tolyq oryndaıtynyn aıt­ty. De­gen­men búginge deıin avto­býs­­­tar teh­nıkalyq talapqa saı shyǵa­rylyp jatqanyn, júrgizýshiler medısınalyq tekserýden ótkizi­letinin jetkizdi. Osy­laı dep bolǵan jaǵdaıǵa baılanys­ty óki­nishin bildirdi.

Jıynda jergilikti polısııa de­par­tamenti jáne ákimshilik polısııa tarapynan tekseris júrgiziletini aıtyldy. Endigi jerde 3 aýysymmen jumys isteıtin 50-60 ákimshilik polısııa ekıpajy avtobýstardyń jol júrý erejesine erekshe kóńil bóledi.

Jantúrshigerlik jaǵdaı áleý­mettik jelide de qyzý talqylandy. Osy rette keıbir oqyrmandar bar kináni kondýktorsyz júıege artyp, olar bolǵanda múmkin tejegishti tartyp úlgerer me edi degen úmitterin bildirip jatty. Buǵan qatysty jolaýshylar kóligi jáne avtomobıl joldary basqarmasynyń basshysy M.Qoqanbaev pikir bildi­rip, kondýktorsyz júıeni bul máselege múldem aralastyrmaýyn ótindi. «Ke­risinshe kondýktorlardy alyp tastaǵan soń avtobýstardyń bir-birimen jarysy toqtaǵan. Sonyń nátıjesinde kólikterdiń buzylý oqıǵalary da azaı­ǵan. Sosyn kondýktorlar bar kezde jospar bolatyn. Ony oryndaý úshin avtobýstar jantalasatyn. Qazir elektrondy tólemniń nátıje­sinde jospar joıylyp, avtobýstar tek kestemen júretin boldy. Júrgizý­shilerdiń aılyq jalaqysy da birshama kóterildi», dedi basqarma basshysy.

Al qaıǵyly oqıǵaǵa sebepker bol­­ǵan adam faktoryna baılanys­ty saýalǵa «Shymkent Bus» kom­pa­nııa­synyń basshysy Azat Qaıyp­bek bylaısha jaýap berdi.

«О́kinishke qaraı, sońy 5 adam­nyń ólimimen aıaqtalǵan apat boldy. Ony týyndatqan 21-baǵyttaǵy avtobýs bizdiń kompanııaǵa qaraıdy. Biz anyqtaǵan derekke saı avtobýs sońǵy aıaldama kelip toqtaǵan. Sol kezde balaly áıel minbekshi bolady. Alaıda júrgizýshi syrtqa shyǵyp keletinin aıtyp, avtobýsty qol tejegishinde qaldyryp, esigin qulyptap tastap ketedi. Sol kezde arada 30-40 sekýnd ótpeı jatyp, kólik tómen qaraı qozǵala bergen. Qaıǵyly oqıǵa bolǵan soń alqynyp jetken júrgizýshi qol tejegishti tartyp qoıǵan. Biraq onyń aldynda avtobýsqa kirgen eki azamat onyń qol tejegishte turmaǵanyn kórgen. Bul jerde bizdiń boljamymyz boıynsha júrgizýshi qol tejegishin tartýyn tartqan, alaıda ol sońyna deıin qoıylmaı qalǵan. Iаǵnı júrgizýshi avtobýstyń tejegishte turǵanyna naq­ty kóz jetkizbegen. Endi bul iske naqty núkteni tergeý nátıjesi qoıady. Avtobýstyń tehnıkalyq jaǵdaıy ma, álde júrgizýshi kináli me, sol kezde anyq­talady. Al kompanııa óz tarapy­nan aýrýhanaǵa túskenderge jáne qaı­tys bolǵan azamattardyń otbasylaryna moral­dyq-materıaldyq kómek kórsetýge daıyn», dedi A.Qaıypbek.

Jalpy, jıyndy uıymdastyrý­shylar bul basqosý bireýdi kinálaý emes, aqyldasý, sa­la­daǵy problemalardy atap kórse­tip, olardyń sheshilý jolda­ryn talqylaý ekenin jetkizdi. Osy oraıda jolaý­shylar tasymalynda qordalanǵan máseleler barshylyq bolyp shyq­ty. Máselen, búgingi tańda salada 300-400-deı avtobýs júrgizýshisi jetis­peıdi. Onyń bir sebebi, kópshiligi aılyq jalaqysy joǵary dep Astana, Almaty qalalaryna ketip qalsa, ekin­shiden júrgizýshilik kýáliktiń D sanatyn alý jáne onymen jumysqa kirý qıyn­dap ketken.

Aıta ketý kerek, qalada jolaýshylar tasymalymen 10 kompanııa aınalysady. Avtobýs júrgizýshileri 2 kún jumys istep, 2 kún demalady. Iаǵnı jumys júktemesi aıyna 15 kúndi quraıdy.

ShYMKENT