Ulttyq mýzeıde memleket qaıratkeri Temirbek Júrgenovtiń 125 jyldyq mereıtoıyna oraı «T.Júrgenov jáne qazaq rýhanııaty» taqyrybynda dóńgelek ústel ótip, jýrnalıst Maııa Bekbaevanyń «T.Júrgenovtiń ómiri men qyzmeti» derekti fılminiń tusaýy kesildi.
Saltanatty jıyndy Ulttyq mýzeı dırektorynyń ǵylymı jumystar jónindegi orynbasary Aqmaral Ibraeva kirispe sózben ashyp, konferensııa jumysyna sáttilik tiledi.
Is-shara barysynda ǵalym Baýyrjan Imanǵalıev «Narkom T.Júrgenovtiń ádebı-pýblısıstıkalyq murasy» atty baıandamasynda: «Temirbek Júrgenov – oıy ushqyr, qalamy qarymdy pýblısıst. Onyń jazýshylyq qyzmetin qaıratkerlik qyzmetinen, qalam sapasyn qaıratkerlik sapasynan bólip alyp qaraýǵa kelmeıdi» dep qaıratkerdiń qoǵamdyq-áleýmettik qyzmeti birshama zerttelse de, onyń qalamgerlik qarymy nazardan tys qalyp qoımaýyn basa aıtty.
Al S.Seıfýllın mýzeıiniń dırektory, professor Marat Ábsámet pen ardager-ustaz Sábıt Imanǵalıev T.Júrgenovtiń jary, Qazaq KSR-niń eńbek sińirgen dárigeri Dámesh Ermekovanyń ónegeli ómirimen tanystyryp, estelikterimen bólisti.
T.Júrgenov atyndaǵy qoǵamdyq qordyń tóraǵasy Sábı Ańsat ashtyqtan turalaǵan halyqtyń rýhyn oıatýda tulǵanyń eńbegi zor ekendigin aıtty. «1936 jyly Máskeýde ótken mádenıet dekadasynda qazaq ultynyń rýhy bıik, óneri men ádebıetiniń eshbir elden kem emestigin dáleldeı bilýi Júrgenovtiń qaısar qaıratkerligi men orasan zor iskerligi, aıryqsha uıymdastyrýshylyq qabiletiniń arqasynda múmkin bolǵanyn umytpaýymyz kerek», dedi ol.
Atalǵan konferensııa jýrnalıst Maııa Bekbaevanyń bastamasymen túsirilgen «T.Júrgenovtiń ómiri men qyzmeti» týraly derekti fılmniń kórsetilimimen jalǵasty.
Kúıshi Janǵalı Júzbaı qaıratkerdiń qazaq mýzykasyna sińirgen eńbegine toqtalyp, elimizde alǵashqy mýzyka teatryn uıymdastyrýǵa qosqan úlken úlesin atap ótti.
Is-shara sońynda júrgenovtanýshy ǵalymdar men belgili qoǵam qaıratkerleri pikir almasyp, konferensııany qorytyndylady.