Birmandatty okrýg boıynsha saılanǵan Májilis depýtaty Ardaq Nazarov Premer-mınıstrdiń orynbasary Altaı Kólginovke joldaǵan saýalynda qazaqstandyq jastar arasynda dástúrli qundylyqtardy damytý mańyzy týraly sóz qozǵady, dep habarlaıdy Egemen.kz.
«8 sáýirde Astanada femınıster sherýi ótti. Bul kúni turmystyq zorlyq-zombylyqqa qarsy mıtıng bolady degen. Biraq olaı bolmady. Jınalǵandar áıel teńdigin aıtýdan bastady, sońynda LGBT-ny nasıhattady. О́rimdeı balalar, arasynda oqýshylar da bar, LGBT jalaýyn jamylyp júr», dedi ol.
Halyq qalaýlysynyń sózinshe, sońǵy kezde elimizdiń aqparattyq keńistiginde LGBT ıdeologııasy erkin nasıhattalyp jatyr.
«Bul qazaq halqynyń ǵasyrlar boıy qalyptasqan salt-dástúrin buzyp, ulttyq qundylyqtarymyzdyń toz-tozyn shyǵarýdy kózdeıdi dep bilemin. Al dástúri men rýhanııatynan aırylǵan ulttyń bolashaǵy joq ekeni aıdan anyq. Ult qurysa – memleket qulaıdy», dep atap ótti depýtat.
Osyǵan baılanysty Ardaq Nazarov kelesi usynystardy shuǵyl nazarǵa alýdy surady.
«Mıtıngke (avt. – Astanada ótken) kelgen balalardyń ata-analarynan suraý alynsyn. Barlyq platformalarda, sonyń ishinde áleýmettik jelilerde ulttyq mádenıetimizge sáıkes kelmeıtin fılmder men serıaldardy kórsetýge jáne nasıhattaýǵa tyıym salynsyn. Teris aǵymdardy nasıhattaıtyn aqparat kózderinen saqtaıtyn zań normalary jasaqtalyp, Parlamentke qarastyrýǵa engizilsin. Respýblıkadaǵy oqý oryndarynda ulttyq qundylyqtardy, mádenıetti nasıhattaý sabaqtary oqytylsyn», dep qorytyndylady depýtat.