Premer-mınıstr Álıhan Smaıylov Memleket basshysynyń otandyq ǵylymdy damytý jónindegi tapsyrmalaryn júzege asyrý barysy týraly sóz sóıledi, dep habarlaıdy Egemen.kz Aqordanyń baspasóz qyzmetine silteme jasap.
Premer-Mınıstr Álıhan Smaıylov otandyq ǵylymdy damytý maqsatynda atqarylǵan ister men aldaǵy josparlar týraly aıtyp berdi.
2020 jyly ǵylymdy qarjylandyrýǵa 89 mıllıard teńge bólinse, bıyl onyń kólemi 160 mıllıard teńgege deıin ulǵaıtyldy. 2025 jylǵa qaraı qarjylandyrý kólemin 240 mıllıard teńgege deıin arttyrý josparlanyp otyr. Ǵalymdardyń jalaqysy byltyr eki ese ósti. Bıyl 20 paıyzǵa kóbeıdi, aldaǵy jyldary – taǵy 20 paıyzǵa artady. Granttar konkýrsynyń qorytyndysyna qaramastan, bazalyq qarjylandyrý aıasynda 700 ǵalym jalaqymen qamtamasyz etildi. Irgeli ǵylymǵa qarajat granttar konkýrstan tys bólinedi. Ulttyq ǵylymı keńester sheshimderiniń obektıvtiligi arta tústi, apellıasııalyq komıssııa quryldy. Qazaqstannyń ǵalymdary jyl saıyn álemniń jetekshi ǵylymı ortalyqtaryna taǵylymdamadan ótýge jiberiledi. Jas ǵalymdarǵa 1000 grantqa deıin bólinedi. 2020 jyly 40 jasqa deıingi jas ǵalymdardyń úlesi 38 paıyz bolsa, búginde bul kórsetkish 46 paıyzǵa jetti. Jobalardy kommersııalandyrý úlesi 27 paıyzǵa artty. Qazaqstan Respýblıkasynyń Prezıdenti janyndaǵy Ulttyq ǵylym akademııasynyń mártebesi joǵarylady. 2029 jylǵa deıin ǵalymdardyń sanyn 1,5 ese arttyrý josparlanyp otyr.