Endi el turǵyndary senimhattardy «eGov Mobile» arqyly onlaın formatta rásimdeı alady. Ádilet mınıstrligi Sıfrlyq damý mınıstrligimen birlesip, azamattarǵa notarıattyq qyzmetter alýdy aıtarlyqtaı jeńildetetin «Sıfrlyq notarıat» jobasyn tanystyrdy.
Osylaısha, Qazaqstan notarıattyq is-qımyldyń osy túrin sıfrlyq formatqa aýdarǵan álemdegi alǵashqy memleketterdiń biri boldy. Búgingi tańda senimhattyń notarıaldy kýálandyrýy tek Fransııa men Lıtvada onlaın rejimde qoljetimdi eken.
Ádilet mınıstri Azamat Esqaraev jobanyń Memleket basshysynyń tapsyrmasy boıynsha Úkimettiń «sıfrlyq» bastamalary sheńberinde (onyń ishinde «Digital Justice» jobalar portfeli aıasynda) ádilet, sıfrlyq damý, ınnovasııalar jáne aeroǵarysh ónerkásibi mınıstrlikteri Respýblıkalyq notarıattyq palatamen birlesip iske asyrylǵanyn atap ótti.
– Eger buryn senimhatty resimdeý úshin qujatqa qol qoıý jáne notarıýs kýálandyrý úshin klıenttiń jeke qatysýy talap etilse, endi notarıattyq senimhat azamattarǵa «eGov Mobile» arqyly qoljetimdi. Al bolashaqta ol birqatar banktik qosymshada da paıda bolady. «Sıfrlyq senimhat» onlaın rejimde klıenttiń notarıýspen beıne baılanysy arqyly rásimdeledi, – dep naqtylady Azamat Esqaraev.
Sıfrlyq senimhatty rásimdeý úshin aldymen «eGov Mobile» qosymshasyna kirý qajet. Odan keıin ótinimdi toltyryp, oǵan elektrondy sıfrlyq qoltańba (ESQ) kómegimen qol qoıýy kerek. Artynsha jeke basyn rastaý úshin qosymshanyń kómegimen notarıýsqa beıne qońyraý shalady. Belgilengen tarıf boıynsha notarıýstyń qyzmetterine aqy tóleıdi. Sońynda «Sıfrlyq qujattar» bóliminde sıfrlyq senimhat daıyn turady.
Bul qyzmetti kez kelgen notarıýs ótinish bergen sátte erkin kórsete alady. «Sıfrlyq senimhatty» memlekettik organdardyń barlyǵynda nemese talap etý orny boıynsha qaǵaz túrindegi balamasymen teńestirýge bolady. Bul rette, qaýipsizdikti qamtamasyz etý maqsatynda «eGov Mobile» qosymshasynda avtorızasııalaý kezinde de, ótinimge qol qoıý kezinde de paıdalanýshynyń bıometrııalyq derekterin qoldana otyryp elektrondy sıfrlyq qoltańba paıdalanylady.
– Bir joly shetelde kezekti is-saparda júrgen kezde mynadaı máselemen betpe-bet keldim: balamdy atasymen birge basqa qalaǵa jiberý qajet edi. Biraq senimhat rásimdeı almadym. Mundaı jaǵdaılar kóbimizge tanys dep oılaımyn. Endi onyń sheshimi bar. Senimhatty onlaın rejimde rásimdeýge bolady. «Sıfrlyq notarıat» «eGovMobile» uıaly qosymshasy arqyly notarıaldy túrde kýálandyrylatyn senimhattardy onlaın formatqa aýystyrýǵa múmkindik beredi. Ony shetelde júrgen azamattar da paıdalana alady. Memleket basshysy Qasym-Jomart Toqaev saılaýaldy baǵdarlamasynda «eGovMobile» mobıldi qosymshasynyń bazasynda memleket halyqpen jáne bıznespen ózara is-qımyl jasaýy úshin tıisti sıfrlyq ınfraqurylym qurý kerektigi týraly aıtqan bolatyn. «Sıfrlyq notarıat» – osy baǵyttaǵy jumystardyń biri. Aldaǵy ýaqytta da memlekettik organdarmen birlesip qazaqstandyqtardyń ómirin jeńildetýge arnalǵan paıdaly jobalardy jalǵastyramyz, – deıdi Sıfrlyq damý mınıstri Baǵdat Mýsın.
Notarıattyq qyzmetti onlaın formatqa aýystyrý – ýaqyttyń talaby. О́ıtkeni elimizde bul qyzmet túrine degen suranys joǵary. Máselen, 2022 jyly el turǵyndarynan senimhatty notarıaldy túrde rastaýǵa 2 mıllıonan astam ótinish kelip túsken.
Búginde elektrondy úkimet 600-den astam memlekettik qyzmet pen servısterdi usynady. 12 mln qoldanýshy mobıldi qosymshaǵa tirkelgen.