Qyzylorda qalasynda qarttar men múgedekterdiń ınternat-úıi janynan ómirdiń qıyn jaǵdaıyna tap bolǵan balalarǵa arnalǵan “Meıir” ońaltý ortalyǵy esik ashty.
Ortalyqtyń ashylý rásiminde oblys ákimi Bolatbek Qýandyqov sóz sóıledi.
– Halqymyz ejelden-aq jetimin qanatynyń astyna alyp, jelep-jebep júrgen. Qaraýsyz balanyń qoǵamnan shettep, jat qylyqtarǵa úıirsek bolatyny belgili. Ondaı jaǵdaılar ómirde bar. Bul meıirimdilik úıi qıyn jaǵdaıda qalǵan balalardy tárbıeleıdi, kútimge alady, baǵyt siltep, jón jolǵa túsiredi. Osydan biraz buryn “Azamattyq Alıans” qaýymdastyǵy, “Igilik” kooperatıvtik qory jáne oblys ákimdigi arasynda birlesken is-qımyl men áriptestik jaıly úshjaqty memorandým qabyldanǵan bolatyn. Osy kelisimde 42 joba bekitilgen, sonyń 17-si iske asyp otyr. Búgingi ońaltý ortalyǵy – sonyń bir kórinisi, – dedi ákim.
Ońaltý ortalyǵy qadaǵalaýsyz qalǵan balalardy úsh aı merzim ishinde jan-jaqty kútimge alady, oqytady. Onan soń olardy ata-anasyna ne basqa da tıisti oryndarǵa tabystaıdy. Bul úshin arnaıy psıholog mamandar, áleýmettik pedagogtar jáne dárigerler qyzmet etedi. Ortalyq ázirshe on bes orynǵa arnalǵan. Ashana, demalys, jatyn oryndarymen jabdyqtalǵan. Osy maqsatqa bıýdjetten tys qarjy kózderinen 6 mln. teńge bólinip otyr.
О́mirge kelgen jańa ortalyqtan negizgi ustanymy – adamgershilik qaǵıdalaryn bıik ustap, sanaly urpaqqa sara jol kórsetý.
Erkin ÁBIL.
Qyzylorda.