Talantty ánshiler baıqaýy

Konkýrstyń aldynda uıymdas­tyrylǵan baspasóz konferensııasynda oblystyq mádenıet jáne sport basqar­masynyń basshysy Mıra Qazbekova bul konkýrs bastaýyn 2006 jyldan alatynyn aıtyp ótti. Alǵash ret sol jyly kompozıtordyń 60 jasqa tolýy­na oraı uıymdastyrylǵan óner saıysy aımaqtyq deńgeıde ótti. Keıin ár 2 jyl saıyn respýblıkalyq dárejede ótip, talaı daryndy jastardyń ónerdegi jolyn ashqan án báıgesi bıyl alǵash ret halyqaralyq aýqym alyp otyr.

Baıqaý sharty boıynsha Qazaq­stannan qatysatyn talapkerler birinshi kezeńde Keńes Dúısekeevtiń bir ánin, ekinshi kezeńde halyq ánderi nemese Qazaq­stan kompozıtorlarynyń bir týyn­dysyn oryndady. Sheteldik ánshiler alǵashqy kezekte kompozıtor ánin, kelesi kezeńde óz eliniń shyǵarmaryn aıtty.

Olardyń ónerine jergilikti kompozıtor, Qazaqstannyń eńbek sińirgen qaıratkeri Ramazan Taımanov, Lıtva eliniń belgili prodıýseri Bırýte Petrıkıte, bolgarııalyq maman Nıkolaı Teke­lıev, Qazaqstannyń halyq ártisi Naǵıma Esqalıeva, kompozıtor Beıbit Oraluly, halyqaralyq konkýrstar men festıvalder assosıasııasynyń múshesi Qarlyǵash Ábdikárimova jáne kompozıtordyń uly Nurken Dúısekeev baǵa berdi.

Aımaq basshysy óz sózinde Qyzyl­orda oblystyq fılarmonııasyna Keńes Dúısekeev esimi beriletinin atap ótti. Daryndy óner ıesi týǵan óńirde byltyr 1000 oryndyq «О́ner ortalyǵynyń» irgesi qalanǵan edi. Bıyl qoldanysqa beriletin ortalyqta konsertterdiń kásibı ári jandy daýysta kórermenge jol tartýyna septigin tıgizetin sım­fo­nııalyq orkestrdiń de tusaýy kesiledi, Ulttyq ónerge ólmes týyndylar qosqan talant atyndaǵy konkýrsta «Úmit» atalymymen Kenje Maı­lybaı ma­rapattalsa, ózbekstandyq Musa Mol­dabaev «Kórermen kózaıymy», taǵy bir jergilikti ánshi Aqylbek Tabynbaev «Týǵan jer» atalymyn ıelendi.

Konkýrstyń úshinshi orny alma­tylyq Almagúl Battalıevaǵa, shyǵys­­-qazaqstandyq Kámıla Talǵatova men bolgarııalyq ánshi Slaveıa Ivanovaǵa berildi. Ekinshi oryn júldesi astanalyq Aıdyn Jumabaevqa, Aqtóbe qalasynan kelgen Azamat Bekbergenovke, qyrǵyz­standyq Abaı Serikovke buıyr­dy. Birinshi oryn ıegerleri bolyp aqtóbelik «Tamsan» trıosy men Polsha ánshisi Mıhal Kachmarek tanyldy.

Qazylar alqasynyń sheshimimen Syr elinde tuńǵysh ret halyqaralyq deńgeıde uıymdastyrylǵan konkýrstyń bas júldesi atyraýlyq ánshi Dana Má­jı­tovaǵa tapsyryldy.

Qyzylorda oblysy