Elimizde zańsyz ıelikke ótken jer telimderin halyq ıgiligine qaıtarý isi jalǵasyp jatyr. Jaqynda Almaty oblysynyń prokýrory Berik Adamovtyń tóraǵalyǵymen jer zańnamasyn saqtaý máseleleri boıynsha alqa otyrysy ótip, basqosýda jerdi tıimdi paıdalaný men zańsyz alynǵan jerlerdi qaıtarý taqyryptary talqylandy. Nátıjesinde Almaty oblysynyń aýmaǵyndaǵy zańsyz jekeshelengen jáne paıdalanylmaı jatqan birqatar nysan memleket menshigine qaıtaryldy.
Zań azamattardyń bárine birdeı qyzmet etýge tıis. Buǵan deıin oryn alǵan «barmaq basty, kóz qysty» áreketter áshkerelenip, jer telimderin zańǵa qaıshy menshikteý faktilerine qatysty tekserý jumystary qarqyn ala bastady. Bul joly prokýratýra Bolat Nazarbaev pen Álııa Nazarbaevaǵa tıesili birqatar shuraıly jerdiń memleket menshigine ótkenin málimdedi.
Quzyrly organ ókilderi habarlaǵandaı, jalpy aýdany 2 myń gektar bolatyn jer telimderi Almaty oblysynyń Jambyl jáne Qarasaı aýdandarynyń aýmaǵynda ornalasqan. «Jandaný» sharýa qojalyǵy ıemdenip kelgen quıqaly jer Jambyl aýdanynyń jer qorynan bólinipti. Degenmen tekseris nátıjesinde kadastrlyq qujatta eki qaýly boıynsha da jaldaý sharttary tirkelmegen. Al MJK AAJ bazasynda bul týraly málimetter múlde joq. Sharýa qojalyǵynyń jalǵa alý sharty da bolmaı shyqqan. Bir qyzyǵy Á. Nazarbaevaǵa tıesili qojalyqqa jer telimin berý kezinde zańnama talaptary óreskel buzylyp, tipti saýda-sattyq ta ótkizilmegen.
«Jer telimin berý týraly sheshim shyǵarar aldynda jergilikti atqarýshy organ olardy terrıtorııalyq belgisine sáıkes málimdelgen nysanaly maqsaty boıynsha ıgerilý-ıgerilmeý jaǵdaıyn aıqyndaýǵa, jer telimin aldyn ala tańdaýdy júzege asyrýǵa, jer komıssııasynyń qorytyndysyn daıyndaýǵa, jerge ornalastyrý jobasyn ázirleýi jáne bekitýge tıis edi. Jergilikti atqarýshy organdar bul jumystardy sheshim qabyldaǵanǵa deıin júrgizbegen, sóıtip jer berý tártibi buzylǵan», delingen Almaty oblysynyń mamandandyrylǵan aýdanaralyq ekonomıkalyq sotynyń málimdemesinde. Osylaısha, 2014 jylǵy 15 qańtardaǵy №4 jer telimin satyp alý-satý sharty jaramsyz dep tanyldy.
Bul turǵyda jergilikti ákimdikter men tıisti basqarmalardyń zań talabyna kóz juma qaraǵanyn aıtý kerek. Máselen, Qarasaı aýdanynyń Úshqońyr aýyldyq okrýginde ornalasqan kólemdi jer B.Nazarbaevqa jeke orman sharýashylyǵyn júrgizý úshin usynylǵan. Alaıda prokýratýra atalǵan ýchaskeni jer zańnamasynyń talaptaryn buza otyryp berilgenin naqtylady. Qarasaı aýdanynyń Almaty qalasymen shektesetin tusynda oryn tepken bul jer telimin paıdalaný tártibi men rejimin Úkimet anyqtaýǵa tıis bolǵan. Mundaǵy taǵy bir shıkilik, jerge ornalastyrý jobasy jergilikti atqarýshy organnyń quqyq berý týraly sheshimi qabyldaǵannan keıin ázirlenip, bekitilgen.
Osyǵan deıin de belgili tulǵalarǵa tıesili jer telimderine qatysty daýly máseleler qoǵamda qyzý talqylanǵan edi. Máselen, ótken jyly Almaty qalasynda jer zańnamasyn buzýdyń 33 deregi tirkelgen bolsa, bul shıkiliktiń 31 deregi memlekettik organdardyń enshisinde. «Kóseýi uzynnyń qoly kúımes» degendeı, Almaty ákimdigi tarapynan – 11, qalalyq Jer qatynastary basqarmasy – 15, «Azamattarǵa arnalǵan Úkimet» korporasııasynan 5 zań buzýshylyq anyqtalǵan. Úsh tulǵa ákimshilik jaýapkershilikke tartylyp, aıyppul arqalaǵan.
Eldegi eleýli ózgerister jeke tulǵalardyń múddesine emes, halyq ıgiligine qyzmet etse ıgi. Keıde bir zańsyz sheshim birneshe keleńsiz jaıdyń týyndaýyna ákelip jatady. Keıingi ýaqyttary mundaı keleńsizdikterdiń jolyn kesýge azamattyq qoǵam ókilderi ún qosyp júr. Qarapaıym halyqtyń ádiletti qoǵam ornatýǵa belsene aralasýy Prezıdent aıtqan ıgi nátıjelerdiń júıeli júzege asýyn jaqyndata túspek. Al quzyrly oryndar bul baǵyttaǵy jumys ári qaraı jalǵasa beretinin aıtady.
ALMATY