Úkimet basshysynyń orynbasary Altaı Kólginovtiń Qyzylorda oblysyna jumys sapary Shıeli aýdanyndaǵy bilim, medısına uıymdary jumysymen tanysýdan bastaldy. Oblys ákimi Nurlybek Nálibaev Altaı Seıdirulyna saladaǵy máselelerdi tanystyryp ótti.
Aýdandaǵy Janseıit eldi mekenindegi №133 negizgi mektep apattyq jaǵdaıda tur. Qyryq bes jyl buryn salynǵan ǵımaratta 6 synyp bólmesi, muǵalimder bólmesi, medısınalyq kabınet qana bar. Sport zaly, ashana, akt zaly joq, materıaldyq-tehnıkalyq bazasy talapqa saı kelmeıdi. Qazir munda eki aýysymda 90 oqýshy bilim alyp otyr. Alda oqýshylar qatary arta túsetin aýylǵa jańa mektep qajet.
Altaı Kólginov Baısyn aýylyndaǵy 250 oryndyq mektep qurylysyn da kórdi. Quny 942,5 mln teńge bolatyn nysan bir jylda boı kóteredi. Aýdan ortalyǵyndaǵy irgeli bilim oshaqtarynyń biri – №45 mektep-gımnazııasy ǵımaraty da apattyq jaǵdaıda tur.
– Memleket basshysynyń tapsyrmasy boıynsha aýyl turǵyndarynyń ómir súrý sapasyn arttyrý, apatty jáne úsh aýysymdy mektepterdi boldyrmaý, pedagogterdi qoldaý, qalalyq jáne aýyldyq mektepterdegi bilim deńgeıin teńestirý úshin jaǵdaılar jasalýda. Úsh aýysymdy jáne apatty mektepter máselesi bıyl bastalatyn «Jaıly mektep» ulttyq jobasy aıasynda sheshim tabady, – dedi Altaı Kólginov. – Bıyl «Bilim berýdi qoldaý qory» esebinen Qyzylorda oblysynda 5 mektep salynady, onyń ishinde daryndy balalarǵa arnalǵan fızıka-matematıka mektep-ınternaty bar.
Sapar barysynda Úkimet basshysynyń orynbasary Shıeli ortalyq kópbeıindi aýdandyq aýrýhanasyn aralady. El saýlyǵyn saqtaýda ǵasyrdan astam ýaqyt qyzmet kórsetip kele jatqan mekemede 271 qyzmetker jumys isteıdi. «Aýylda densaýlyq saqtaýdy jańǵyrtý» ulttyq jobasy aıasynda 2023-2024 jyldary Qyzylordada 27 densaýlyq saqtaý nysany boı kóteredi. Qyzylorda qalasynda qan ortalyǵy, bir aýysymda 100 kelýshige arnalǵan emhanasy jáne onkologııalyq bólimshesi bar 300 oryndyq kópbeıindi aýrýhana qurylysy bastaldy.
Aımaqtaǵy ózekti máselelerdiń biri – jastardy jumyspen qamtý. Úkimet basshysy orynbasarymen jastar kezdesýinde osy máseleni sheshýdegi memleket usynǵan múmkindikter týraly aıtyldy. Atap aıtqanda, jumysqa ornalasýǵa járdemdesý barysynda jalaqyny sýbsıdııalaıtyn «Birinshi jumys orny» jáne oqý úderisinde eńbek tájirıbesin jınaýǵa kómektesetin «Jastar praktıkasy» jobalary iske qosyldy. «Agrarlyq nesıe korporasııasy» AQ 5-7 jyldan aspaıtyn merzimge, jyldyq 2,5%-dan bastap, ıkemdi sharttarmen 5 mln teńgege deıin nesıeler berý arqyly jastardyń kásipkerlik bastamalaryn qoldaıdy. Qyzylorda oblysynda 2023 jyly osyndaı jobalardy iske asyrýǵa 1,2 mlrd teńge bólý josparlanǵan. Qazir 7 ótinim maquldandy. Bıznesti damytýdyń taǵy bir tásili – halyqtyń áleýmettik turǵydan qorǵalmaǵan toptary úshin óteýsiz grant tabystaý.
Vıse-premer jastarmen belsendi jumys isteýmen qatar olardy qoldaý baǵyttaǵy tetikter týraly túsindirme jumystaryn júrgizý qajettigine toqtaldy.
– Elimizde Memleket basshysynyń tapsyrmasy boıynsha jastar máselelerin sheshýdiń pármendi tetikteri engizildi. Biraq kóp jastar mundaı múmkindikter týraly bilmeıdi. Aqparattandyrýdyń, keri baılanys ornatýdyń barlyq tásilderin qoldaný qajet, dep atap ótti A.Kólginov.
Qyzylorda qalasyna qarasty Baımurat batyr aýyly turǵyndarymen kezdesýde Altaı Kólginov turǵyndardy jumyspen qamtýǵa baǵyttalǵan «Aýyl amanaty» baǵdarlamasy týraly aıtty. Baǵdarlamany Qyzylorda oblysynda júzege asyrýǵa bıyl 3 mlrd teńge qarastyrylǵan.
– «Aýyl amanaty» aýyldaǵylarǵa óz bıznesin bastaýǵa nemese burynnan bar kásibin damytýǵa múmkindik beredi. Ol úshin jeńildikpen nesıe mólsherlemesi engizildi, bıýdjetten qomaqty qarajat bólinýde. Aýyl turǵyndarynan talap etiletin basty nárse – bastama kóterý men jumys isteýge degen umtylys. Aýylda jaıly ómir súrý úshin jaǵdaı jasalyp, mektepter, aýrýhanalar, joldar, ınjenerlik ınfraqurylym salynýda. «Aýyl amanaty» baǵdarlamasy – aýyl turǵyndarynyń ómir súrý deńgeıin jaqsartýdyń taǵy bir qadamy, – dedi Úkimet basshysynyń orynbasary.
Qyzylorda