Qazaqstan musylmandary dinı basqarmasy bıylǵy Qadir túnin sáýirdiń 17-nen 18-ne qaraǵan túnine belgiledi, dep habarlaıdy Egemen.kz.
Quranda Qadir túniniń naqty ýaqyty aıtylmaıdy, ál-Buharı hadısinde Ramazan aıynyń sońǵy 10 kúnindegi taq túnderdiń biri ekeni aıtylǵan. Kópshiligi muny Orazanyń 27-shi túni dep sanaıdy.
«Qadir túni – berekeli Ramazan aıynda keletin qasıetti tún. Ramazan aıynyń sońǵy on túni musylman úshin óte mańyzdy. Sebebi Qadir túninde qasıetti Quran Kárim túse bastady. Sondyqtan Islam dininde bul tún erekshe baǵalanady. Quran Kárimde «Qadir» súresi bar. Osynyń ózi-aq bul túnniń asa ardaqty ekeninen habar beredi», dep jazylǵan QMDB saıtynda.
«Qadir» – arab sózi. Tildik maǵynasy qadirli, qasıetti, ólshemmen bekitilgen, artyq-kemi joq, durys degen maǵynalarǵa saıady. Al sharıǵı termındik maǵynasyna «bir jylda bolatyn isterdi belgilep, sonyń jazylýyna Alla Taǵalanyń úkim beretin túni», dep anyqtama berilgen.
Qadir túniniń birneshe belgisi bar. Ǵulamalardyń aıtýynsha, Qadir túniniń belgileri eki topqa bólinedi. Birinshisi – ýaqytynda (ıaǵnı sol túni) bilinetin belgiler. Oǵan sol túnniń ashyq, aı sáýlesiniń jaryq bolýy; júrektiń tynyshtyǵy, ýaıym-qaıǵyǵa berilmeı tynyshtyqty sezinýi; adamǵa jaǵymdy samal jeldiń esýi; sýyq ta, ystyq ta emes qolaıly aýa raıynyń bolýy jatady. Ekinshisi – tań atqanda bilinetin belgi. Buǵan kúnniń sáýlesiz qyzaryp shyǵýy jatady.
Qadir túninde qulshylyqtardy kóbeıtýge, Qurandy kóbirek oqýǵa, duǵa-tilekter jasaýǵa keńes beriledi.
Aıta keteıik, bıylǵy Ramazan aıy 23 naýryzda bastaldy. 21 sáýirde musylmandar Oraza Aıt merekesin atap ótedi. Bul datalardy Qazaqstannyń musylmandar dinı basqarmasy Ortalyq Azııa elderiniń múftılerimen, pátýa salasyna jaýapty ǵalymdarmen keńesip, sondaı-aq ǵylymı zertteýlerdiń nátıjelerin eskere otyryp belgilegen.
Bıylǵy pitir sadaqasy jan basyna 535 teńge bolyp bekitildi. Pitir sadaqasy mólsheri elimiz boıynsha eki keli unnyń ortaq baǵasy negizinde belgilendi. Pitir sadaqasyn qurma, meıiz baǵasymen berýge bolady.