Qazaqtyń jas kásipqoı boksshylary Ábilhan Amanqul (2-0, 2 KO) men Bek Nurmaǵanbet (8-0, 6 KO) ózderiniń kelesi jekpe-jekterin muhıttyń arǵy betinde ótkizip, kezekti jeńisterine qol jetkizdi.
Áýesqoı boksta talaı bıikterdi baǵyndyryp, únemi úzdikter qatarynan kórinip júrgen otandastarymyz kásipqoı boksta da jeńisti joldaryn sátti jalǵap keledi. Máselen, kúni keshe AQSh-tyń Kalıfornııa shtatynda uıymdastyrylǵan boks keshinde álem chempıonaty men Azııa oıyndarynyń kúmis júldegeri Ábilhan Amanqul meksıkalyq Danıel Echeverrıamen judyryqtasyp, qarsylasyn merziminen buryn tize búktirdi. Ekinshi orta salmaqta ótken jekpe-jek segiz raýndqa josparlanǵanymen, otandasymyz básekeni úshinshi raýndta nokaýtpen aıaqtady. Bul – jerlesimizdiń kásipqoı bokstaǵy úshinshi jeńisi.
Al taǵy bir ekinshi orta salmaqta judyryqtasatyn otandasymyz, WBA International belbeýiniń ıegeri Bek Nurmaǵanbet Venesýela ókili Eber Rondondy nebári birinshi raýndta sulatyp saldy. Áýesqoılar arasynda Azııa chempıony atanǵan jerlesimizdiń bul – kásipqoı bokstaǵy toǵyzynshy jekpe-jegi jáne toǵyzynshy aıqyn jeńisi.
Endi eki boksshy 6 mamyrda Meksıkanyń Gvadalahara qalasynda ótetin Saýl Alvares (58-2-2, 39 KO) pen brıtanııalyq Djon Raıder (32-5, 18 KO) arasyndaǵy boks keshinde óner kórsetedi.