Kezinde aǵaıyndy Mahmut, Maqsut Omarovtar sport súıer qaýymnyń ystyq yqylasyna bólendi. Aǵaıyndy qos sańlaq Qazaq eli sportynyń kósh basynda júrdi. Myńdaǵan jankúıer aǵaıyndy Omarovtardyń boksyn kórý úshin Almatynyń sport arenalaryna qaraı lek-legimen aǵylyp jatatyn. Ol kezde Qazaqstanda qazaqtyń úlesi kem. Máskeýdiń otarshyl saıasatynyń saldarynan ultymyzdyń rýhy janshylyp, eńsesi túsken bir kezeń edi. Sol tusta, ıaǵnı 1947 jyly qazaq boksynyń atasy Shoqyr Bóltekulynyń qarshyǵadaı ǵana shákirti Mahmut Omarov KSRO chempıonatynyń eń birinshi medalin Qazaqstanǵa alyp keldi. Bul tarıhı jeńis bolatyn. Odan keıin de Ortalyq Azııa men Qazaqstan jarystarynda talaı márte jeńis tuǵyryna kóterildi.
Kóp uzamaı Mahmuttyń izin basyp týǵan inisi Maqsut shyqty atoılap. Ol sporttyq nátıje jaǵynan aǵasynan asyp tústi. 1957 jyly KSRO chempıonatynyń qola medaline bolǵan Maqsut 1959 jyly KSRO halyqtary spartakıadasynyń kúmis júldegeri atandy. Tarıhı shejireni paraqtasaq, atalǵan spartakıadada medal alǵan tuńǵysh qazaq sportshysy Maqsut Omarov eken. Endi qarańyzdar, Mahmut Omarov KSRO chempıonatynyń júldegeri bolǵan eń alǵashqy qazaqstandyq boksshy bolsa, Maqsut Omarov – odaq spartakıadasynda júldegerler sapyna kirgen tuńǵysh qazaq boksshysy.
Ýaqyt ozyp barady. Keıingi jastardyń basym kópshiligi bul kisilerdiń tarıhı jeńisterinen beıhabar. Buǵan olar emes, kóp jaǵdaıda biz kinálimiz. Sebebi, osyndaı tarıhı tulǵalardy nasıhattaýǵa, shejirege tirkeý jaǵyna jete mán bermeımiz. Endigi tilegimiz: Qostanaı oblysynyń Jangeldın aýdanyndaǵy Torǵaı aýylynda ornalasqan sport keshenine jerlesterimiz Mahmut, Maqsut Omarovtardyń esimi berilse. Aýyldastary bilsin, osy qarasha aýyldan elge tanymal eki birdeı darabozdyń shyqqanyn. Jastar solarǵa qarap boı túzesin, namystaryn qaırasyn, bıik belesterge qulash sermesin.
Tarıh jańǵyryp turady. Urpaqtar sabaqtastyǵyn saqtaý – bizdiń paryzymyz. Qazaqtyń ár qıyryndaǵy tarıhı tulǵalar halyqtyń jadynan óshpese degen tilegimiz bar. Qostanaı oblysynyń ákimi Qumar Aqsaqalov aqsaqaldardyń únine qulaq asady degen senimdemiz.
Jumahan SÁDÝAQASOV,
Murat OSPANOV,
eńbek ardagerleri
Qostanaı oblysy,
Jangeldın aýdany,
Torǵaı aýyly