Sońǵy ýaqytta kıberqylmys pen ınternettegi alaıaqtyq azamattarǵa úlken zalal ákelýde. Qylmyskerler aqsha urlaýdyń jańa joldary men ádisterin oılap taýyp jatyr, dep habarlaıdy Egemen.kz Polisia.kz saıtyna silteme jasap.
Qylmystyń osy túrimen kúresý úshin IIM «CyberPol» pılottyq jobasyn iske qosty. Bul joba sıfrlyq tehnologııalar arqyly jasalatyn zańsyzdyqpen kúresý, memlekettik organdarmen ózara is-qımyl jasaý jáne halyq arasynda quqyqtyq saýattylyqty arttyrýdy kózdeıdi.
Pılottyq joba ótken jyldyń 1 jeltoqsanynan bastap elordanyń «Esil» aýdany PB janyndaǵy polısııa bóliminiń aýmaǵynda iske asyrylýda.Quramynda bes tergeýshi, bes jedel ýákil jáne bir IT-krımınalıst bar «CyberPol» toby az ýaqyt ishinde 234 ınternet-alaıaqtyqty ashyp, sotqa 184 qylmystyq is jibergen.
«Qazirgi ýaqytta bizde ótinish qabyldaý jeńildetilgen. Adam kelgennen keıin biz onyń aryzyn qabyldaımyz. Sol qabyldaǵan tergeýshi bul isti sońyna deıin ózi júrgizedi. Birinshiden, adam ýaqyt joǵaltpaıdy, ekinshiden, ol árqashan tergeýshimen baılanysta bolady», deıdi «CyberPol» soqqy-nysanaly tobynyń aǵa tergeýshisi Nurtas Sattar.
Ortalyqta sıfrlyq zerthana jumys isteıdi, onda mamandar gadjetterge tehnıkalyq tekserýler júrgizip, alaıaqtyq áreketter jasalǵan baǵdarlamalardy anyqtaıdy.
«Birinshi kezekte IIM tarapynan kıberqylmystardy tergeýge erekshe nazar aýdarylyp jatqanyn atap ótkim keledi. Sonyń arqasynda «CyberPol» pılottyq jobasy quryldy. Bul – kıberpolısııa. Shyn máninde, kıberqylmystardy tergeýmen aınalysatyn jeke bólimsheni jasaqtaý sheshimin durys dep oılaımyn. Sebebi bul úlken bilimdi, resýrstardy jáne belgili bir aqparatty alý úshin ártúrli qurylymdarmen, uıymdarmen ózara is-qımyl jasaýdy qajet etedi», dedi Kıbershabýyldardy taldaý jáne tergeý ortalyǵynyń kıberqaýipsizdik salasyndaǵy mamany Vıtalıı Perov.