Memleket basshysy «Habar» Agenttigi» AQ Basqarma tóraǵasy Berik Ýálıdi qabyldady. Prezıdentke Agenttiktiń qyzmetin zaman talabyna saı jańǵyrtý jóninde berilgen tapsyrmalardyń oryndalýy týraly baıandaldy, dep habarlaıdy Egemen.kz Aqordanyń baspasóz qyzmetine silteme jasap.
Atap aıtqanda, Agenttik qyzmetkerlerin áleýmettik jaǵynan qoldaý sharalaryna, jańadan qurylǵan oblystardyń ortalyqtary – Jezqazǵan, Qonaev qalalarynda menshikti tilshiler pýnktterin ashýǵa qatysty máseleler talqylandy.
Memleket basshysyna «Habar» Agenttigin» tehnıkalyq turǵyda jańǵyrtý jospary, 2022-2023 jyldary aksıonerlik qoǵamnyń quramyna kiretin telearnalarda qolǵa alynǵan aqparattyq, qoǵamdyq-saıası jáne tanymdyq jobalar jaıly málimet berildi.
Qasym-Jomart Toqaev Agenttiktiń atqarǵan jumysyn oń baǵalady jáne memlekettik aqparattyq saıasatty júzege asyrý isinde mańyzdy ról atqaratynyn atap ótti.