Aýyldaǵy baldyz apasyna telefon shalypty. Birdeńe surardaǵy ádeti. Úıdegi «jarym patshanyń» ámiri júrip turǵanyn ishi sezedi. Bul jolǵy buıymtaıy – bir qap kartop. Onda da ońtústikten keletini emes, jergilikti jerdiki bolýy kerek eken. Basqasy ishine jaqpaıtyndaı aıtqan bazynasy osy. Áýeli kartop egýge daıyndalyp, tuqymǵa surap turǵan shyǵar dep úmittenip qaldym. Úıleriniń janyndaǵy atamyzdan qalǵan kartop egetin jerdiń qorshaýy jer baýyrlaı jantaıa qısaıyp, julym-julym bolyp jatýshy edi. Múmkin sol jerdi iske jarataıyn dep umtyldy ma eken. Baldyzdyń kúrekteı qolyn qımyldatatyn kezi sırek.
– Kartop egýge daıyndalyp jatyr ma, áli erte ǵoı, jer jibigen joq? – dep ejiktedim men.
– Joq, jeýge kerek eken, – dedi apasy, – alǵasyn aýylǵa qatynaıtyn kólikterdiń birine salyp jiber.
«Jazǵan qulda sharshaý joq», qoltyǵyma qap qystyryp alyp, kartop izdeýge shyqtym. Kelesi kóshedegi azyq-túlik dúkeniniń aldynda qysy-jazy baqshalarynyń ónimderin satyp turatyn ájeıler men aǵaılar bar. Ekindi aýǵan kezde barsam, qazdaı tizilip tur eken. Qudaı-aý, bul jerde ne joq deısiz. Sarymsaqtyń barmaq basyndaı bireýi 500 teńge, qytaıdiki odan arzan. Biraq, biletinderdiń aıtýyna qaraǵanda, qoldan ekkenniń sapasy jaqsy. Ájeılerdiń aldynda tosap, tuzdalǵan qııar, qyzanaq, qyryqqabat tolyp tur. Kartop ta bar eken. Kılosy 400 teńge. Dúkende, árıne, arzan. Nebári 130 teńge. Qymbat bolsa da alyp jatqandar bar. Kózi tanys Tımofeı aǵaı da tur. Izdegen kartobym tabyla ketti. 25 kılolyq kartoptyń qaby 10 000 teńgege shyqty.
– Taǵy da bar ma, – dedim alatyn adam qusap.
– Bar, – dedi Tımofeı aǵaı kókónisterin júk salǵyshyna salǵan sý jańa sheteldik mashınasyna buryla berip, – qansha kerek, erteń ala keleıin.
– Qaıda saqtaısyz? – dep suradym men.
– Garajymnyń astynan úlken etip ura qazyp alǵanmyn. Kúzde salǵan azyq-túlik jaz shyqqansha búlinbeıdi.
Saýdasy júrip turǵan Tımofeı aǵaı áńgimege kiristi. Aıtýyna qaraǵanda, áne bir jyly Reseıge kóshken týystary úsh saıajaıyn tastap ketipti. Sol jerge Tımofeı aǵa ájeı ekeýi jaz boıy kókónis egedi eken. О́sirgen ónimderin qys boıy satady.
– Átteń, jerimiz azdaý, – dedi jetpistiń jýan ortasynda bolsa da kúsh-qaıraty boıynda turǵan qarııa, – áıtpese budan da kóp egýge bolar edi.
Jer demekshi, álgi meniń boıy báıterekteı baldyzym turatyn aýyl kóz aldyma elestegeni. Baqshalyq jer jetip jatyr, tyńaıtqysh esebindegi kóń taý-teńiz ári tegin. Sý eki bastan. Sóıtip otyryp Tımofeı aǵaıdyń kartobyna telmirtip qoıǵanyn aıtsańshy.