Ál-Farabı atyndaǵy Qazaq ulttyq ýnıversıtetinde jýrnalıstıka tarıhy men ǵylymı mektepter negizin qalaǵan ustaz-ǵalymdar – Qaıyrjan Bekhojın, Temirbek Qojakeev, Marat Barmanqulov oqýlary ótti.
Ǵalymdardyń shyǵarmashylyq murasyn zertteýge arnalǵan is-sharaǵa jýrnalıstıka fakýltetiniń ǵalymdary Klara Kabylǵazına, Saǵatbek Medeýbekuly, Ǵalııa Ibraeva, Sáýle Barlybaeva, Ámirhan Moldabekov qatysyp, estelik aıtty.
«Qaıyrjan Bekhojın, Temirbek Qojakeev, Marat Barmanqulov sııaqty qazaq jýrnalıstıkasynyń korıfeılerinen dáris alyp, keıinnen áriptes bolǵanymdy ómir boıy maqtanysh etýden tanǵan emespin. О́ıtkeni adamgershiliktiń bıiginde, ǵylymnyń shyńynda tanylǵan mundaı tulǵalardyń ómir joly – ultymyzǵa ulaǵat. Ǵalymdar qurmetine arnalǵan baıqaý ýnıversıtette jylda ótip keledi. Baıqaýdyń ǵalymdardyń shyǵarmashylyǵyn, eńbekterin tanyp-bilýi úshin jýrnalıstıkanyń ǵylymı tujyrymdamasy negizderin baǵamdaý úshin shákirtterge tıgizetin paıdasy mol», dedi Jýrnalıstıka fakýlteti baspasóz jáne elektrondy BAQ kafedrasynyń dosenti Klara Kabylǵazına.
Atalǵan kafedranyń dosenti Saǵatbek Medeýbektiń aıtýynsha, ustazdy ulyqtaýdyń, urpaq sanasyna ulaǵatyn uıalatýdyń ozyq úlgisi jýrnalıstıka fakýltetinde úzdiksiz jalǵasyp keledi. «Ulttyq jýrnalıstıkanyń maıtalmandaryn tárbıelegen Qaıyrjan Bekhojın, Temirbek Qojakeev, Marat Barmanqulov oqýlary arqyly shákirtterdiń kásibı mashyǵyn jetildirý, quzyrettiligin arttyrý – shyn máninde ulaǵatty is. Talaı daryndylardyń tusaýyn kesken, bolashaǵyna jol ashqan bul oqýlardyń respýblıkalyq aýqymda ótip jatqany qýantady», dedi ol.
Jas ǵalymdardyń jýrnalıstıka oqýlary ǵylym men bilimge, ónege men tárbıege baýlýda yqpaldy da tanymdyq sharaǵa aınalyp keledi. Osy oraıda stýdentter men jas ǵalymdarǵa arnalǵan baıqaýdyń nátıjesi boıynsha jeńimpazdar dıplomdarmen marapattalyp, úzdik jumystarǵa bir rettik arnaıy shákirtaqy taǵaıyndaldy.
ALMATY