Bul kúnderi Ońtústik Koreıanyń Sývon qalasynda shaıbaly hokkeıden qyzdar arasyndaǵy álem chempıonaty ótip jatyr. Birinshi dıvızıonnyń «V» tobynda baq synap jatqan jerlesterimiz alǵashqy eki oıynda sátsizdikke ushyrady.
Qazaqstan quramasy bıylǵy álemdik dodada Ulybrıtanııa, Polsha, Slovenııa, Italııa jáne Ońtústik Koreıa quramalarymen sheberlik baıqasyp jatyr. Osy topta jeńimpaz atanǵan bir ǵana qurama «A» tobyna joldama alady. Jerlesterimiz álem chempıonatyndaǵy alǵashqy oıynyn Ulybrıtanııa quramasymen ótkizip, bir shaıba aıyrmashylyǵymen jeńilip qaldy. Alǵashqy eki kezeńde hokkeıshiler bir-biriniń qaqpasynan sańylaý taba almady. Tek básekeniń aıaqtalýyna 11 mınýt qalǵanda brıtanııalyq hokkeıshiler gol soǵyp, jeńiske jetti – 1:0.
Sývondaǵy saıystyń ekinshi kúninde Vıktorııa Sazonova shákirtteri Slovenııa qyzdarymen kezdesip, bul joly da bir shaıba aıyrmashylyǵymen qarsylastaryna jol berdi – 2:1. Slovenııa sapynan Sara Konfıdentı (3-mınýt) men Pıa Pren (45) mergendigimen kózge tússe, Qazaqstan quramasynan Aleksandra Golotvına dáldik tanytty.