Kiristiń kózi – týrızmde. Muny jaqsy biletin elder týrızmge qomaqty qarjy bólse, týrıstik kompanııalar arasynda básekelestik qyzyp tur. Al týrıster kóbine-kóp buryn-sońdy kórmegen, tańsyq dúnıelerge qyzyǵady. Mysaly, qazir mýzeıdegi eksponattardy tamashalaýǵa taptyrmaıtyn vırtýaldy murajaı veb-saıttary bar. Bul da bolsa, ólkeniń mádenı-tarıhı muralaryn qashyqtan tamashalaýǵa múmkindik beredi.
Mundaı mýzeıdiń artyqshylyǵy – eksponattardy ár qyrynan jaqyndatyp nemese alystatyp kórýge múmkindik beredi. Vırtýaldy mýzeı tarıhı eskertkishterdiń uzaǵyraq saqtalýyna septigin tıgizedi ári qonaqtarǵa tıimdi. Nege desek, kez kelgen azamat vırtýaldy murajaıdan eksponattardy tez ári anyq kóre alady. Osyǵan qarap-aq vırtýaldy murajaı erekshe qabiletti jandarǵa qolaıly ekenin bilýge bolady.
Jýyrda Mádenıet jáne sport mınıstrligi men Ortalyq memlekettik mýzeı mamandary uıymdastyrǵan «Uly dalanyń ulttyq dástúrleri» halyqaralyq ǵylymı forýmynda Kazakh Tourism ulttyq kompanııasy Meta-vırtýaldy mýzeı jobasynyń ıdeıasyn usyndy. Jobany IT jáne CGI sıfrlyq anımasııa tehnologııasy salasynda jumys isteıtin «Sifro» kompanııasymen birlesip iske asyryp jatyr. Biregeı mýzeıdiń jobasy «Qazaqstannyń materıaldyq emes mádenı murasy: jańa ádister men qaǵıdattar» seksııasynda usynyldy. Seksııa barysynda Kazakh Tourism kreatıvti ındýstrııalar departamentiniń joba jetekshisi Ásel Serikbaeva vırtýaldy mýzeıdiń múmkindigi jaıynda aıtyp bergen edi.
– Meta-vırtýaldy mýzeıi – bul vırtýaldy shyndyq, ınteraktıvti tehnologııalar jáne álemniń kez kelgen jerinde qoljetimdi murajaı keshenin qurýǵa arnalǵan qural. Kádimgi mýzeılerdiń ornalasqan aýmaǵyna jáne eksponattardyń sanyna qaraı shekteýler bolsa, meta-vırtýaldy mýzeıdiń múmkindigi mol. Onda barlyq eksponattyń sandyq kóshirmeleri, sondaı-aq vırtýaldy kórmeler men ekspozısııalar bolýy múmkin», – deıdi Á.Serikbaeva.
Osy forýmǵa ǵylymı uıymdardyń qyzmetkerleri, muǵalimder, shyǵarmashylyqqa den qoıǵan zııaly qaýym, mýzeı, arhıv, kitaphana mamandary, jas ǵalym, túrki áleminiń tarıhy men mádenıetin zertteıtin stýdentter, magıstranttar men doktoranttar jáne basqa da múddeli tulǵalar qatysqan. Forým sońynda Mádenıet jáne sport mınıstrligi kreatıvti ındýstrııalardy damytýǵa jaýapty ýákiletti organ bolyp belgilense, Kazakh Tourism-de kreatıvti týrızm departamenti ashylǵanyn bildik. Demek, elde kreatıvti sektordy damytýǵa, kreatıvti kásipkerlerdiń ónimderin eksportqa shyǵarýǵa basymdyq beriledi.