20 sáýir kúni, saǵat 11:00-de Almatyda josparly jalpyqalalyq seısmıkalyq oqý-jattyǵý ótedi. Qalalyq Tótenshe jaǵdaılar departamenti megapolıs turǵyndary men qonaqtarynan túsinistikpen qarap, sabyr saqtaýdy suraıdy, dep habarlaıdy Egemen.kz.
Qala uıymdarynda seısmıkalyq oqý-jattyǵýlar toqsan saıyn ótkiziledi. Birinshi toqsanda 2,8 myńnan astamy oryndaldy.
Seısmıkalyq oqý-jattyǵýdyń negizgi maqsaty – turǵyndardy evakýasııalaý jolyn, qaýipsiz jerlerdi aldyn ala anyqtap, apat kezinde qajet chemodandardy daıyndaýy úshin qala turǵyndarynyń tótenshe jaǵdaılar kezindegi is-qımyldarǵa daıyndyq deńgeıin arttyrý.
Qaýipsiz oryndar – elektr jelileri men ǵımarattardan alys ornalasqan ashyq jerler.
«Jalpyqalalyq seısmıkalyq daıyndyqqa aldyn ala daıyndalyńyz. Mysaly, tele-radıo arnalarda habarlandyrý bastalyp ketti, almatylyqtar oqý-jattyǵý evakýasııasy týraly aqparattandyrylady, usynystar berildi. Seısmıkalyq oqý-jattyǵý ótetin kúni sırenalyq qondyrǵylardy iske qosý, tele jáne radıoarnalar arqyly qalalyq eskertý júıesi iske qosylady, «Darmen» mobıldi qosymshasy arqyly push-habarlamalar jiberiledi», dep habarlady TJD.Almaty 9-10 baldyq seısmıkalyq aımaqta ornalasqan. Jyl saıyn qalada 200-ge deıin álsiz, sezilmeıtin jer silkinisi bolady. Bul rette kúshi 2-den 4 balǵa deıingi jer silkinisi Almaty úshin fondyq rejım bolyp sanalady. Seısmologııa ınstıtýtynyń boljam komıssııasynyń málimetinshe, jyl sońyna deıin qalada 7 jáne odan da kóp baldyq jer silkinisi bolmaıdy. Sondyqtan júrgizilip jatqan qalalyq seısmıkalyq daıyndyq jer silkinisi bolady degen boljamǵa esh qatysy joq.