Jastardyń arasyndaǵy jantúrshiger jaǵdaılar men otbasyndaǵy zorlyq-zombylyq jıilep, kún tártibindegi máselege aınalyp barady. Prezıdent buǵan jaýapty oryndar qyzmetin jóndi atqaryp jatqan joq deıdi, dep habarlaıdy Egemen.kz.
Qasym-Jomart Toqaev Turmystyq zorlyq-zombylyqtyń aldyn alý saıasatyn qaıta qaraý qajettigin aıtty.
«Taǵy bir nazar aýdaratyn másele – jas urpaqtyń qaýipsizdigi. Balalarǵa qatysty jantúrshigerlik qylmystar jıilep ketti. Mundaı oqıǵalar mektepte, kóshede, tipti, úıde bolyp jatyr. Soraqy jaǵdaılar oqýshylardyń ózine qol jumsaýyna sebepker bolyp otyr.
Tipti ata-analardyń ózderi balasyna qorlyq kórsetip, onyń arty qaıǵyly jaǵdaıǵa ulasyp jatady. Otbasyndaǵy zorlyq-zombylyqtyń aldyn alý jumysy álsiz. Jaýapty mekemeler men quqyq qorǵaý organdarynyń qyzmeti oıdaǵydaı nátıje bergen joq. Turmystyq zorlyq-zombylyqtyń aldyn alý saıasatyn qaıta qaraýymyz kerek», dedi Memleket basshysy.
Sondaı-aq ol elimizde qaýipsiz qoǵam qurý basty mindet ekenin eskertti.
«Áıelder men balalardyń quqyqtaryn qorǵaý sharalaryn zańmen kúsheıtý kerek. Otbasy qundylyqtaryn dáripteý isine erekshe kóńil bólgen jón. Taǵy da eskertemin, biz qoǵamdaǵy, kóshedegi, tipti ár úıdegi qaýipsizdikti qamtamasyz etpesek, damyǵan elderdiń qataryna qosylýymyz qıyn bolady. Azamattarymyz erkin júrip-turatyn qaýipsiz qoǵam qurýymyz qajet», dedi Prezıdent.