Almatyda shetel azamatyn áýejaıdan qonaqúıge 45 myń teńgege aparǵan taksıst ustaldy, dep habarlaıdy Egemen.kz.
Ishki ister mınıstrliginiń málimetinshe, 18 sáýirde Almaty qalasy áýejaıyndaǵy jelilik polısııa bólimine Lufthansa áýekompanııasynyń «Frankfýrt – Almaty» baǵytyndaǵy reısimen kelgen 43 jastaǵy Germanııa azamaty shaǵymdanǵan. Ol ózin áýejaıdan qonaqúıge joǵary baǵamen, ıaǵnı 45 myń teńgege jetkizgen taksı júrgizýshisine qatysty shara qoldanýdy suraǵan. Kólik polıseıleri jedel-izdestirý is-sharalaryn júrgizý barysynda taksı júrgizýshisin anyqtady. Ol Almatynyń 45 jastaǵy turǵyny bolyp shyqty. Er adam Germanııa azamatyna taksı qyzmetin usynyp, Almaty qalasynyń halyqaralyq áýejaıynan qaladaǵy Qonaev kóshesinde ornalasqan qonaqúıge aparǵany úshin joǵary tólem alǵan.
Taksı júrgizýshisi keltirgen shyǵyndy ótedi. Quqyq buzýshy QR ÁQBtK-niń 449-babynyń 1-bóligi (Qoǵamdyq oryndarda tıisý) boıynsha ákimshilik jaýapkershilikke tartyldy.
Germanııa azamaty kólik polıseılerine joǵary kásibılik tanytqandary jáne qarajatyn keri qaıtaryp alýǵa kómekteskenderi úshin alǵys aıtty.