19 sáýirde Astanada salynyp jatqan turǵyn úı keshenderiniń birinde qurylys krany qulady, dep habarlaıdy Egemen.kz TJM О́QK Astana qalasy boıynsha departamentine silteme jasap.
«19 sáýirde saǵat 09:25 shamasynda Astana qalasy, Komsomolskıı t.m., Aqyn Sara kóshesi 53 ýchaskesinde ornalasqan Inshaat Invest JShS-niń «Kiriktirilgen úı-jaılary men parkıngi bar kóppáterli turǵyn úı kesheni» qurylys alańynda QTZ-63 munara kranynyń seksııasy buzyldy», delingen habarlamada.
Oqıǵa ornynda Tótenshe jaǵdaılar mınıstrligine qarasty О́nerkásiptik qaýipsizdik komıtetiniń Astana qalasy boıynsha departamentiniń qyzmetkerleri jumys istep jatyr.
«Departament jergilikti atqarýshy organdar men basqa da múddeli tulǵalardy tarta otyryp, oqıǵanyń mán-jaıyn anyqtaý, sondaı-aq tıisti tergeý júrgizý maqsatynda arnaıy komıssııa qurady», dep qosty departament ókilderi.
Aıta ketsek, oqys jaǵdaıdan zardap shekkender joq. Aldyn ala boljam boıynsha, keleńsiz jaıt shamadan tys júkteme saldarynan oryn alǵan.