Shaıbaly hokkeıden álem chempıonatyna daıyndalyp jatqan Elimizdiń jasóspirimder quramasy mańyzdy báseke aldynda jarys qojaıyndary – Fransııa hokkeıshilerimen sheberlik baıqasyp, iri eseppen jeńiske jetti.
Jasóspirimder arasyndaǵy shaıbaly hokkeıden A dıvızıonynyń álem chempıonaty 24-29 sáýir kúnderi Fransııanyń Anje qalasynda uıymdastyrylady. Sergeı Starygın jetekshilik etetin Qazaqstan quramasy jahandyq dodanyń aldynda Fransııamen joldastyq match ótkizip, 7:2 esebimen basym tústi.
Bul matchta jerlesterimizden birinshi kezeńde – Dáýlet Núrkenov, Egor Levkoves (dýbl), ekinshi kezeńde – Nıkıta Sıtnıkov (dýbl), Roman Bolshedvorskıı, úshinshi kezeńde Kırıll Kankın mergendigimen kózge tústi. Elimizdiń jasóspirimder quramasy Fransııadaǵy álem chempıonatynda Majarstan (23 sáýir), Japonııa (24 sáýir), Danııa (26 sáýir), Ýkraına (27 sáýir) jáne Fransııa (29 sáýir) hokkeıshilerimen kezdesedi.