Eki apta buryn ótken Úkimet otyrysynda Premer-mınıstr Álıhan Smaıylov janarmaı baǵasyn kóterýge qandaı sebepter túrtki bolyp otyrǵanyn jan-jaqty aıtqan bolatyn.
Úkimet basshysy óz sózinde Qazaqstan janarmaıynyń kórshi memleketterge tranzıttik kóliktermen jáne «sur» eksport túrinde tasymaldanýyn basty sebep retinde ataǵan edi.
Energetıka mınıstrliginiń 12 sáýirdegi №140 buıryǵyna sáıkes janar-jaǵarmaıdyń shektik baǵasy bekitildi. Oblys ákimdigi energetıka jáne turǵyn úı-kommýnaldyq sharýashylyq basqarmasynyń basshysy Qudaıbergen Qorǵanbaevtyń aıtýynsha, AI-92 jáne AI-93 markaly benzın baǵasy óńirde 205 teńge bolyp bekigen.
«Aı-92 jáne Aı-93 markaly benzınniń baǵasy lıtrine 205 teńge bolyp bekitilip otyr. Al dızel otynynyń (jazǵy, maýsymaralyq) lıtri 450 teńgeden ótkerilmek.
Naqtyraq aıtar bolsaq, Qazaqstan Respýblıkasynyń quzyrly oryndarymen berilgen júrgizýshi kýáligin kórsetken azamatqa táýligine 100 lıtrge deıingi kólemde 1 lıtr úshin 295 teńgemen satý kózdelse, júk kóligi, arnaıy jáne mamandandyrylǵan avtomobılder men avtobýstarǵa táýligine 300 lıtrge deıingi kólemde 1 lıtr úshin 295 teńgemen satý týraly sheshim qabyldanǵan», deıdi basqarma basshysy.
Q.Qorǵanbaev keltirgen derekterge kóz júgirtsek, óńirdegi árbir janarmaı quıý beketteriniń ıeleri jeke kásipker sýbektisi retinde ózderi satatyn janarmaı baǵasyn shekti deńgeıden aspaıtyn baǵada naqtylaýǵa mindetti. Al janarmaı quıý beketterinde baǵa belgilengen shekti mejeden asqan jaǵdaıda turǵyndar tabıǵı monopolııalardy retteý komıtetiniń óńirlik departamentine habarlasyp, shaǵymdana alady.