Keshe Memleket basshysy Qasym-Jomart Toqaevtyń tóraǵalyǵymen elimizdiń áleýmettik-ekonomıkalyq damý máseleleri jóninde keńeıtilgen keńes ótti. Jıyn barysynda Prezıdentimiz jýyrda ótken Májilis jáne máslıhattar saılaýy saıası reformalardyń mańyzdy kezeńi bolǵanyn aıtty. Osylaısha, bılik tarmaqtarynyń tepe-teńdigi ornyqty.
Endi Parlament, jańadan jasaqtalǵan Úkimet, ákimder jáne barlyq bılik organdary áleýmettik-ekonomıkalyq saladaǵy máselelerdi sheshýge burynǵydan da basa mán berýi kerek. Osyǵan oraı Memleket basshysy bul baǵyttaǵy birqatar basymdyqty belgilep berdi. Áleýmettik-ekonomıkalyq saıasat, eń aldymen, azamattardyń ómir súrý sapasyn arttyrýǵa baǵyttalýy qajet. Búginde bul máselede ınflıasııa basty kedergi bolyp otyr.
Soǵan baılanysty Prezıdentimiz ınflıasııanyń monetarlyq jáne monetarlyq emes faktorlarynyń áserin azaıtýdy tapsyrdy. Bul rette kúndelikti taýarlardyń qymbattaýy ózekti másele ekeni belgili. Onyń sebebin anyqtaý úshin óndiristen satylymǵa deıingi barlyq tizbekti jan-jaqty qaraý qajet. Sondaı-aq Memleket basshysy baǵanyń kúrt ósýimen kúresý úshin turaqtandyrý qorlaryn tıimdi paıdalanýdy, aýyl sharýashylyǵy ónimderin saqtaý jáne ótkizý boıynsha zamanaýı ınfraqurylym qurý jumystaryn jedeldetýdi tapsyrdy.
Jalpy, barlyq ekonomıkalyq saıasat ekonomıkany ártaraptandyrýǵa jáne oqshaýlaýdy udaıy arttyra otyryp otandyq óndiristi damytýǵa basymdyq berýi qajet. Prezıdentimiz atap ótkendeı, elimizdi ındýstrııalandyrý saıasaty naqty ári shynaıy júrgizilýge tıis. Ol úshin otandyq bankterdi ulttyq ekonomıka men óndiristerge kredıt berýge jumyldyrý, bıznes pen ınvestısııalar úshin qolaıly jaǵdaılar jasaý óte mańyzdy.
Sonymen qatar elimizge áleýmettik-ekonomıkalyq damýdyń negizi bolatyn jańa Salyq saıasaty kerek. Ol qosylǵan quny joǵary ónim óndirisine salynatyn ınvestısııalardy qoldaýǵa jáne tehnologııalyq eksportty yntalandyrýǵa baǵyttalǵany jón.
Ekonomıkalyq ósýdiń taǵy bir mańyzdy sharty energetıkalyq jáne ınjenerlik ınfraqurylymdy jańǵyrtý ekeni anyq. Osyǵan oraı Memleket basshysy Úkimetke «Investısııa ornyna tarıf» jańa tarıftik saıasatyna kóshýdi tapsyrdy.
Keńeste Prezıdent aýyl turǵyndarynyń tabysy men turmys sapasyn arttyrý máselelerin de erekshe baqylaý kerektigin aıtty. Bul rette ekonomıkalyq saıasatty iske asyrý jáne ınvestısııalar tartý úshin ákimderge zor jaýapkershilik júkteledi.
Sondaı-aq jergilikti ózin-ózi basqarý áleýetin de tıimdi paıdalaný qajet. Keńeske oblystyq jáne aýdandyq máslıhat tóraǵalarynyń qatysýy – osy baǵyttaǵy mańyzdy qadam.
Senat – birinshi kezekte, óńirlerdiń múddesin qorǵaıtyn Palata. Sondyqtan aldaǵy ýaqytta mańyzdy áleýmettik-ekonomıkalyq máselelerdi sheshý jáne halyqtyń ómir súrý sapasyn arttyrý úshin Úkimet, ákimder jáne máslıhattarmen birlesken jumysymyzdy belsendi túrde jalǵastyra beremiz.
Máýlen ÁShIMBAEV,
Senat tóraǵasy