Shaıbaly hokkeıden Qazaqstan qyzdar quramasy Ońtústik Koreıanyń Sývon qalasynda jalaýy jelbiregen álem chempıonatynyń úshinshi matchynda da jeńilip qaldy.
Birinshi dıvızıonnyń «V» tobynda baq synap jatqan jerlesterimiz bul týrda Italııa qyzdarymen kezdesip, 3:0 esebimen qarsylastaryna jol berdi. Kezdesýdiń birinshi kezeńinde Emı Varano san basymdyǵyn júzege asyryp, matchtyń esebin ashsa, úzilisten keıin Apennın túbeginiń ókilderi Arına Shekolova qorǵaǵan qaqpadan taǵy eki márte sańylaý tapty. Goldyń avtorlary – Avrora Abatandjelo men Mıa Kampo.
Bul – Qazaqstan quramasynyń álem chempıonatyndaǵy úshinshi oıyny jáne úshinshi jeńilisi. Buǵan deıin jerlesterimiz Ulybrıtanııa (0:1) jáne Slovenııa (1:2) hokkeıshilerinen jeńilgen bolatyn. Vıktorııa Sazonova shákirtteri kelesi týr oıynyn erteń Polsha quramasymen ótkizedi.