Janarynyń jaryǵy sónse de, júrektegi jalyny sónbegen Jańbyrshy Úseıinovtiń ánderi kisi balasyn beıjaı qaldyrmaıtyny anyq. Ýaqytynda belgili ánshilerdiń oryndaýynda tanylǵan kompozıtor shyǵarmalaryn búginde jas talanttar ýaqyt aǵymyna saı shyrqap júr. Osylaısha, talant ıesiniń týyndylarynyń ekinshi ómiri bastaldy.
Qulannyń qońyr áýenin boıyna sińirip ósken óner ıesin eske alýǵa arnalǵan «Saǵynysh-2» konsertine kelýshilerdiń qarasy qalyń. Retroǵa aınalǵan Jańbyrshynyń ánderi ádiptelgen keshke ár býyn ókilderi jınalyp-aq qalypty. Arasynda jasy alpysty alqymdap qalǵan ustazdyń oqýshylary da bar...
Alataý baýraıyndaǵy Kókdónen aýylynda belgili kompozıtor Mels О́zbekovpen birge óner saparyna qatar shyqqan talanttyń ekeýi de búginde aramyzda joq. Alaıda júrekterge jaryq sáýle túsirip ketken kompozıtor ánderi Mels О́zbekov atyndaǵy mádenıet úıinde jıi shyrqalady. Shyn ónerdiń ólmeıtinin kompozıtordyń lırıkalyq ánderin tyńdaǵanda túsinesiń.
Aýylda júrip-aq «Tań samaly» ansamblin qurǵan Jańbyrshy Úseıinovtiń «Qudasha», «Aǵaıyndar», «Dosyma hat» sekildi ózge ánderi ónersúıer qaýymnyń júregine jetti.
Marqumnyń qyzy, áriptesimiz Ardaq Úseıinova ákesiniń ánderin qatardaǵy konserttegideı ánshilerdiń birinen soń birin oryndaýyna múmkindik bermedi. Stýdentterden quralǵan akterlik quram ár ánniń tarıhyn qoıylym túrinde jetkizip jatty. Kóńildi aýyl keshi, aýyl adamdarynyń minezi, tapqyrlyǵy, ańǵaldyǵy sekildi qasıetter jas akterlerdiń sheberligi arqyly kórermenge dóp jetti. Jas rejısser Daryn Daýymovtyń sheshimderi de kókeıge qondy.
Konsert barysynda Jańbyrshy Úseıinovtiń «Dosyma hat», «Jastyǵymnyń jalyny», «Jigit syry», «Aǵaıyndar», «Saǵynysh» sekildi lırıkalyq ánderin jas ánshiler jeter jerine jetkize oryndady. Álbette, kompozıtordyń birdi-ekili ánin jas talanttarmen birge shyrqaǵan, koloratýralyq soprana daýysty ánshi Gaýhar Myrzahmetova kópshiliktiń qoshemetine bólendi.
Sahnadaǵy akterlerdiń qımyly, kıim kıisi, júris-turysy, tipti bıine deıin retrolyq sıpatta bolǵany qýantty. Sol arqyly biz sazger ǵumyr keshken ýaqyttyń tynysyn sezindik. Konsert sońynda kompozıtordyń zamandastary men ini-qaryndastary birinen keıin biri sahnaǵa shyǵyp, «Saǵynysh-2» keshinde óner ıesine degen saǵynyshtaryn aqtaryp jatty. Qysqasy, saǵynysh sazymen ádiptelgen án keshi qulandyq ónersúıer qaýymǵa unaǵany anyq.
Jambyl oblysy,
Turar Rysqulov aýdany