Bir kezde «Áýlıe-Ata Fenıks» qus fabrıkasy otandyq naryqty baǵyndyryp qana qoımaı, alys-jaqyn memleketterge qus etin eksportqa shyǵarady dep eshkim oılamasa kerek. Onyń búgingi ıesi Farıda Júnisova Jambyl oblysy Baızaq aýdanyna qarasty Myrzataı aýyldyq okrýgindegi qańqasy ǵana qalǵan qus fabrıkasyn satyp alǵanda «Qırap qalǵan dúnıeni qaıtpek?» degender az bolǵan joq.
Biraq isker áıel alǵan betinen qaıtpady. Kásiporyndy aıaǵyna turǵyzyp, jumysyn jandandyra tústi. Bıznesin órkendetýge Agrarlyq nesıe korporasııasynyń jeńildetilgen nesıesiniń kómegi tıdi.
Qus fabrıkasy aty aıtyp turǵandaı, fenıks qusy sekildi, 2016 jyly qaıta quryldy. Qańqasy ǵana qalǵan ǵımaratty qalpyna keltirip bolǵan soń kásiporyn basshysynyń aldynda ony zamanaýı tehnıkamen jabdyqtaý maqsaty turdy. Buǵan qomaqty qarajat qajet edi. Qarjy kózin izdeı júrip, fabrıka ıesi Agrarlyq nesıe korporasııasyna júgindi.
«2018 jyly sol kezdegi «Agroeksport» baǵdarlamasymen 658 mln teńge nesıe rásimdep, Nıderlandydan qus ósirýge qajetti zamanaýı qural-jabdyqtar men aýyl sharýashylyǵy tehnıkasyn satyp aldyq. Bul bizge óndiris qýatyn arttyrýǵa múmkindik berdi. Jylyna 5 myń tonna qus etin óndiretin edik. Tehnologııany jańartqaly et óndirisi 7 myń tonnaǵa deıin artty», deıdi «Áýlıe-Ata Fenıks» JShS dırektorynyń kómekshisi Ilııas Dúısen.
Qus fabrıkasynyń aýmaǵy 536 gektar jerdi alyp jatyr. 18 qus ósirý qorasy bar. Kásiporynda taýyq etinen 37 túrli ónim shyǵarylady. Jylyna 3 mln-ǵa jýyq qus soıylady. Balapandarǵa bıdaı men júgeri berip, salmaǵyn eki kılogramnan asyrmaı baǵady. Halyqaralyq standart talaby solaı. Dırektordyń kómekshisiniń sózine sensek, «Áýlıe-Ata Fenıks» taýyq etimen tek ishki naryqty qamtyp otyrǵan joq. Byltyr kórshiles Qyrǵyz Respýblıkasy men Reseı Federasııasyna eksportqa 400 tonna ónim jóneltilgen. Bul shamamen jalpy ónimniń bes paıyzǵa jýyǵyn quraıdy.
Memlekettiń qoldaýy arqyly ishki naryq pen eksportqa ónim shyǵarýdy jolǵa qoıǵannan keıin seriktestiktiń qarjylyq jaǵdaıy ońalyp, áleýeti arta bastady. Nátıjesinde, jumyskerlerdiń de jaǵdaıy túzeldi. Qazir qus fabrıkasynda 247 azamat eńbek etip júr. Olardyń basym bóligi – jergilikti turǵyndar. Jumyskerler jalaqylaryn ýaqtyly alyp otyr. Olarǵa on úshinshi jalaqy da qarastyrylǵan. Ortasha jalaqy mólsheri – 149 myń teńge.
«Áýlıe-Ata Fenıks» qojaıyny endi fabrıkany keńeıtý úshin Agrarlyq nesıe korporasııasynan taǵy 1 mlrd teńge nesıe alýǵa bekinip otyr. Jańa ǵımarat salyp, shetelden qural-jabdyq satyp ákelip, qus ósiretin qora sanyn 24-ke jetkizbek.
«Qarajat qolymyzǵa tıse, tehnıkalyq bazany kúsheıtip, qus eti óniminiń kólemin 12 myń tonnaǵa deıin jetkizýdi josparlap otyrmyz. Agrarlyq nesıe korporasııasy arqyly nesıe alýdyń óz artyqshylyqtary bar. Máselen, eki jylǵa deıin nesıeni óteýden bosatady. Áıtse de, biz bir jyl ǵana demalys aldyq. Bul orta bıznespen aınalysyp otyrǵan seriktestikter úshin óte qolaıly. О́z-ózińe kelip, shıryǵyp alý úshin bir jyl ýaqyt jetkilikti. Odan keıin toqsan saıyn alty paıyzben berilgen nesıeni ýaqtyly ótep otyrasyń», deıdi «Áýlıe-Ata Fenıks» JShS dırektorynyń kómekshisi Ilııas Dúısen.
Agrarlyq nesıe korporasııasy el boıynsha 19 qus fabrıkasyn 36 mlrd teńgege qarjylandyrǵan. Jambyl oblysyndaǵy fılıaly sońǵy jyldary óńirde qus fabrıkasy sekildi 6 iri jobaǵa 4 mlrd teńge nesıe bergen. Qazir fılıal aýyl sharýashylyǵy taýarlaryn óndirip otyrǵan 9 myńǵa jýyq kásipkerge qyzmet kórsetip otyr.
Jambyl oblysy,
Baızaq aýdany,
Myrzataı aýyly