Atyraý oblysynda jyl saıyn kásipkerlik sýbektileriniń sany artyp keledi. Oblystyq kásipkerlik jáne týrızm basqarmasy basshysynyń mindetin atqarýshy Sáttiǵul Sabyrovtyń málimetinshe, byltyr shaǵyn jáne orta bıznes ıeleriniń úlesi ishki jalpy ónimniń 22,7 paıyzyn quraǵan. Al bıylǵy 1 aqpanda kásipkerlikpen aınalysýshylardyń qatary 70 717-ge jetti.
Qazir óńirdegi 35 myń kásipkerlik nysandy qyz-kelinshekter basqarady. Kásipkerlikke bet burǵan áıelder tarapynan memlekettik baǵdarlamalarǵa qatysý belsendiligi baıqalady. Byltyr 600 áıel kásipkerdiń jobasy qarjylandyrylǵan. О́z kásibin ashýǵa nıet bildirgen 37 kásipkerge 106 mln teńgeniń qaıtarymsyz granty usynylǵan. Onyń 24-i – áıelder. Olar jańadan 30 jumys ornyn ashqan. Qyz-kelinshekter jetekshilik etetin kásipkerlik sýbektileri negizinen bilim berý, densaýlyq saqtaý, jeńil ónerkásip salalaryn damytýǵa baǵyttalǵan.
Tabys kózin kásipkerlikten tapqandardyń arasynda Mahambet aýdanynyń Alǵa aýylynda turatyn Gúljanat Erqalıeva da bar. Kópbalaly ana jeke kásibin bastaý úshin 2019 jyly «Bıznes bastaý» baǵdarlamasyna qatysyp, 505 myń teńge qaıtarymsyz grant alǵan. Qazir ol sulýlyq salony men kıim dúkenin ashqan.
– О́zim – Oraldyń qyzymyn. О́mirlik serigim Maral Dinǵalıevke 2013 jyly turmysqa shyǵyp, Alǵa aýylyna kelin bolyp tústim. Negizgi mamandyǵym – dızaıner. Eki balamyz ómirge kelgennen keıin jumysqa shyǵýdy oılastyrdym. Biraq balalarǵa qaraıtyn adam bolmady. Kúıeýim shaǵyn kásip ashýǵa keńes berdi. Alǵashynda túrli zattar sata bastadym. Sodan soń joldasym ekeýmiz «Bıznes bastaý» baǵdarlamasyna qatysyp, arnaıy kýrstan óttik. О́zimniń atyma memleketten qaıtarymsyz grant alyp, úıimizdiń bir bólmesinen sulýlyq salonyn ashtyq. Keıin shaǵyn ǵımarat saldyq. Bir jaǵynda sulýlyq salony, ekinshi bóliginde kıim dúkeni bar. Joldasym shashtarazdyqty meńgerdi. Al ózim qyz-kelinshekterdiń betin, tyrnaǵyn árleımin, deıdi G.Erqalıeva.
Al Gúlzııa Isembaeva besik jasaýyn ulttyq naqyshpen tigýge bet burǵan. Buryn onyń áýletinde tiginshilikpen eshkim aınalyspaǵan. О́zi birneshe jyl buryn qurylys ındýstrııasynda ınjener-ekolog bolyp jumys istegen.
– Tiginshilikti qolǵa alǵanymda, bul qadamyma tańdanyspen qaraǵandar kóp boldy. Sebebi buryn mundaı iske bet burýdy oılaǵan joq edim. Tuńǵysh qyzym boıjetken soń materıaldyq, qarjylyq ıgilikter bala qýanyshyn almastyra almaıtynyn uǵyndym. Sol kezde bala súısek degen oıǵa bekindik. Osyny sezgen bolýy kerek, qyzym besik terbetip otyrǵan ananyń sýretin syılady. Tipti aǵaıyn-týystar, dos-jarandar ómirge kelgen balalaryna kindik sheshe bolýymdy ótindi. Eshqaısysyna qarsy bolmadym. Qolqa salǵandardyń bóbegine qajetti dúnıelerdi izdep júrip, ulttyq naqyshtaǵy túrleri tabylmaǵanyna qynjyldym. Osy olqylyqtyń ornyn toltyrý úshin qolyma is tigetin mashınka alyp, besik jasaýyn tigýdi bastadym, deıdi Gúlzııa Isembaeva.
Árıne jańa kásibi úshin burynǵy jumysynan bas tartýǵa týra keldi. Sóıtip, ózi dızaınerlikti de, tiginshilikti de meńgerip alǵan.
Ulttyq naqyshpen besik jasaýyn tigetin sheberdiń qolynan shyqqan buıymdy tapsyryspen aldyratyndar kóbeıdi. Tapsyrys berýshiler besik jasaýyn AQSh-ta ómirge kelgen nemeresine, Ońtústik Koreıada ósip jatqan jıenderine jibergen. Reseı Federasııasyndaǵy Astrahan, Orynbor oblystarynda turatyn qandastardan da tapsyrys túsip turady.
«Besiktiń ár jasaýyn bar yntammen tigýge tyrysamyn. О́ıtkeni besik jasaýy kishkentaı sábı úshin jaıly, ata-anasyna, sol otbasyndaǵy adamdarǵa unaıtyndaı ádemi bolýy kerek. Ulttyq naqyshtaǵy oıýdy salý úshin arnaıy qurylǵyny paıdalanamyn. Osy isti qolǵa alǵanda, besik jasaýynan ulttyq naqyshty kórgim keldi», deıdi jergilikti sheber.
Tiginshiniń aıtýyna qaraǵanda, sábı súıýdi ańsaǵan juptar da besik jasaýyn satyp alady. Keıin súıinshi surap, qýanyshymen bólisetinderi bar.
«Qazaq – yrymshyl halyq. Besik jasaýyn yrymdap alǵandar da sábı súıgenin qalaımyn. Bul kásipti adamdarǵa qýanysh, baqyt syılaýdyń joly dep esepteımin. Sol sebepten, ár tigisti júrgizgende, bóbekke qýanysh syılaǵanyn ishteı tilep otyramyn», deıdi Gúlzııa Isembaeva.
Atyraý oblysy