Astanadaǵy Tuńǵysh Prezıdent kitaphanasynda «Koreı shamanızmi – gýt. Rýhtyń tynysy» atty fotosýretter kórmesi ashyldy.
Mazmundy shara kitaphananyń «Mádenıet arqyly únqatysý» halyqaralyq kórme jobasy aıasynda elimizdegi Koreı Respýblıkasy elshiliginiń Koreı mádenı ortalyǵymen birlesip uıymdastyryldy. Fotosýret kórmesi Koreı elin ejelgi nanym – shamanızm arqyly tanystyrady. Bul – sońǵy ýaqytqa deıin koreı túbeginde keń taralǵan birneshe negizgi dinı aǵymnyń biri.
– Bul bizdiń kitaphana men elshiliktiń janyndaǵy Koreı mádenı ortalyǵymen birlesip ótkizgen jetinshi is-sharamyz. Bıyl bizdiń yntymaqtastyǵymyzǵa bes jyl toldy. Osy jyldar ishinde kitaphanada koreılik tanymal sýretshilerdiń birqatar kórmesi ótip, onda ataqty koreı murajaılaryndaǵy tarıhı jádigerler qoıyldy. Dástúrli koreı kıimderiniń kórsetilimderi men sheberlik sabaqtary ótti. Mádenı seriktestigimiz eki halyq arasyndaǵy dostyqty nyǵaıtýǵa óz septigin tıgizedi dep úmittenemin, – dedi Tuńǵysh Prezıdent kitaphanasynyń dırektory Baqytjan Temirbolat.
Koreı Respýblıkasynyń Tótenshe jáne ókiletti elshisi Ký Hong Sok byltyrǵy mádenı almasý jyly bıyl da jalǵasyn tapqanyn atap ótti.
– 2023 jáne 2024 jyldar Koreıaǵa barý jyly bolyp jarııalandy. Osyǵan baılanysty qazir túrli is-sharalar ótip jatyr. Sizderdi koreılerdiń dástúrli nanym-senimderi men shamanızm taqyrybyndaǵy kórinisterdi túsirgen fotograftarymyzdyń muraǵattaryndaǵy sýretter arqyly Koreıamen tanystyramyz. Bul fotosýretter uzaq ýaqyt boıy shyndyqtan tys álemdi túsinýge tyrysqan koreılerdiń júregine úńilýge múmkindik beredi, – dedi elshi.
Sondaı-aq kórme avtorlarynyń biri Lı Hangý Vengrııa men Polshadan keıin koreı «gýt» shamanızmine arnalǵan bul kórme Ortalyq Azııada alǵash ret ótip otyrǵanyn aıtty. «Munda avtorlardyń ártúrli túsindirmelerin, sonymen qatar koreı shamanızminiń sonaý ótken dáýirden qazirgi kúnge deıingi ózgeristerin kórip, sezinesiz. Fotosýrettermen jumys isteı otyryp, men baqsynyń mańyzdy psıhoterapevtik ról atqaratynyna, adamdardyń qorqynyshtary men úreılerin emdeıtinine kóz jetkizdim. Bul kórme arqyly kelýshiler tereń uıqydaǵy sezimderin oıatyp, shabyt alady», dedi ol.
Kórmege Kım Sonnam, Kım Donhı, Lı Gıýchel, Pak Chanho, An Sehon, Lı Hangý sekildi alty derekti fotosýretshiniń jumysy qoıyldy. Olar Koreı óneri men mádenıetin, ata-babalar ómiri men rýhyn, sondaı-aq bes myń jyldyq tarıhy bar koreı shamanızmin sheberlikpen asha bilgen.