Taldyqorǵan qalasyndaǵy «Jastar» sport saraıynda elimizdegi sport mektep-ınternat-kolledjderiniń oqýshylary arasynda dástúrge aınalǵan Mádenıet jáne sport mınıstrliginiń «Mınıstr kýbogi» básekesiniń jeńimpazy men júldegerleri anyqtaldy.
Sportty damytý dıreksııasynyń málimeti boıynsha, jas daryndy sportshylar arasynda uıymdastyrylǵan básekede Astana qalasynyń Q.Muńaıtpasov atyndaǵy olımpıada rezerviniń respýblıkalyq mamandandyrylǵan mektep-ınternat-kolledjiniń oqýshylary úzdik shyqty. Olar fınalda Jetisý oblysynyń Jaqsylyq Úshkempirov atyndaǵy Olımpıada rezerviniń oblystyq mektep-ınternat-kolledji tárbıelenýshilerimen sporttyń bes túri boıynsha saıysty. Bas júlde úshin ótken básekede elordadan kelgen sportshylar dzıýdo, grek-rım, taekvondo jáne bokstan basym tússe, jetisýlyqtar tek erkin kúresten ǵana alda boldy. Osylaısha, Q.Muńaıtpasov atyndaǵy olımpıada rezerviniń respýblıkalyq mamandandyrylǵan mektep-ınternat-kolledjiniń komandasy bıylǵy «Mınıstr kýboginde» top jaryp qana qoımaı, qatarynan ekinshi márte úzdik shyqty.
Al qola júlde Jambyl oblysynyń mektep-ınternat-kolledji komandasynyń sportshylaryna buıyrdy. Olar úshinshi oryn úshin ótken jarysta dańqty boksshy, Olımpıada chempıony Bekzat Sattarhanov atyndaǵy olımpıada rezerviniń respýblıkalyq mamandandyrylǵan mektep-ınternat-kolledji tárbıelenýshilerin qapy qaldyrdy. Atap aıtqanda, jambyldyq órender sporttyń boks, taekvondo jáne erkin kúres túrlerinen jeńiske jetse, grek-rım kúresi men dzıýdo sportynda túrkistandyqtardyń mereıi ústem boldy.
Jarystyń jeńimpaz ben júldegerlerin MSM Sport jáne dene shynyqtyrý isteri komıteti Sport rezervi basqarmasynyń basshysy Amanbaı Nurmuhanbetov, Sportty damytý dıreksııasy dırektorynyń orynbasary Azamat Imashev, Atlanta Olımpıadasynyń qola júldegeri Máýlen Mamyrov, Jetisý oblysy Dene shynyqtyrý jáne sport basqarmasynyń basshysy Ulan Rysqul marapattady.
«Bul básekeniń dittegeni – daryndy balalardyń kózge túsýine jaǵdaı jasap, sport mektep-ınternat-kolledjder arasyndaǵy básekelestikti arttyrý. Bul sportshylar erteńgi ulttyq qurama ókilderi ekenin umytpaýymyz kerek. Sondyqtan biz jastarymyzǵa zor senim artamyz. Halyqaralyq jarystarda júldeli bolyp, jankúıerlerdi tek jeńispen qýantqandaryn qalaımyz. Osy jarys atalǵan dańǵyl jolda tájirıbe jınaýǵa zor septigin tıgizedi dep oılaımyn», dedi A.Nurmuhanbetov.
Osymen ekinshi ret uıymdastyrylǵan jarysta elimizdiń 17 sport oqý ordasynan 2007-2008 jyldary dúnıege kelgen 450-den astam jasóspirim sporttyń dzıýdo, boks, taekvondo, grek-rım jáne erkin kúres túrlerinen synǵa tústi. Bıylǵy jarys baǵdarlamasyna taekvondo sporty jańadan qosylǵanyn aıta ketken jón. Jeńimpazdar bokstan 7 salmaqta, qalǵan sport túrlerinen 5 salmaqta anyqtaldy.
Jarys erejesine sáıkes, 17 komanda birinshi irikteý saıysynda 4 topqa bólinip, bir-birimen aınalmaly júıe boıynsha kezdesti. Ár topta 1-oryn alǵan oqý ordasy ǵana jartylaı fınalǵa joldama alǵan. Sosyn, A men S tobynyń, taǵy V men D tobynyń úzdigi fınalǵa shyǵý úshin talasty.
Keshendi jarys byltyrdan beri Mádenıet jáne sport mınıstrliginiń qoldaýymen uıymdastyrylyp keledi. Byltyr irikteý saıystary elimizdiń 4 qalasynda ótip, alǵashqy jeńimpaz ben júldegerler Astanada anyqtalǵan bolatyn.
Uıymdastyrýshylar tarapynan «Mınıstr kýbogin» ıelengen komanda ókilderine bes mıllıon, ekinshi oryn ıelerine úsh jáne qola júldegerlerge eki mıllıon teńge kóleminde qarjylaı syıaqy tabystaldy.