Qyzylorda qalasynda báıgeden el chempıonatynyń ońtústik aımaqtyq II irikteý týrnıri uıymdastyryldy. Jarystyń saltanatty ashylýyna oblys ákimi Nurlybek Nálibaev, Ulttyq sport qaýymdastyǵynyń prezıdenti Islambek Saljanov, respýblıkalyq «Báıge» federasııasynyń prezıdenti Qanat Kópbaev qatysty.
Báıge qyzyǵyn kórýge jınalǵan jurt aldynda aımaq basshysy keıingi jyldary óńirde ulttyq sport túrleri buqaralyq sıpat alyp kele jatqanyna toqtaldy. Osy kúni Syrda 16 myńnan astam adam ulttyq sportpen shuǵyldanady. Olar byltyr el chempıonaty men kýbokterinde, álem jáne Azııa chempıonattarynda úzdikter qatarynan kórinip, medal sany jaǵynan keıingi bes jyldyqtaǵy rekordty jańartty.
Oblysta 8 ulttyq sport túri boıynsha 797 jattyqtyrýshy 26 396 sportshy tárbıeleýde. Onyń ishinde «Qyzylorda oblystyq ulttyq at sporty federasııasy» qoǵamdyq birlestigi, «Kókpar» federasııasy» respýblıkalyq qoǵamdyq birlestiginiń Qyzylorda oblystyq fılıaly, «Qyzylorda oblysynyń báıge federasııasy» qoǵamdyq birlestikteri bar. Sonymen qatar Qyzylorda qalasynan 2018 jyly «Ulttyq jáne at sporty túrleri boıynsha sport klýby» KMM qurylyp, qazir 7 sport túri boıynsha (qazaq kúresi, jamby atý, teńge ilý, aýdaryspaq, toǵyzqumalaq, asyq atý, ulttyq jekpe-jek) 12 jattyqtyrýshy-oqytýshy 407 sportshyny baýlyp keledi.
– Búgingi respýblıkalyq báıge Syr óńiriniń mereıin asyryp, ulttyq sporttyń órkendeýine jańa serpin beredi dep senemin. Tózim men jiger, qaırat pen minez synǵa túsken báıgede tulparlardyń tuıaǵy talmasyn, – dedi oblys ákimi.
Ulttyq sport qaýymdastyǵynyń prezıdenti Islambek Saljanov ulttyq sportty damytý – memleket saıasatynyń mańyzdy baǵytyna aınalǵanyn aıtty. «Babadan qalǵan baǵzy ónerdi kásibı jáne buqaralyq baǵytta damytý qolǵa alynyp, el aýmaǵynda ulttyq sport túrlerin jańǵyrtý úshin kóptegen jarys uıymdastyrylyp keledi. Osy jyldan bastap kókpar oıyndary fýtbol tárizdi lıga formatynda ótkizile bastaıdy. Kelesi jyly V Dúnıejúzilik kóshpendiler oıyny Qazaqstanda ótedi», dedi I.Saljanov.
Osydan keıin báıge bastalyp, ıppodromǵa jınalǵan jurttyń qıqýyna at tuıaǵynyń dúbiri qosylyp sala berdi. Bul jolǵy báıgeniń júlde qory 35 600 000 teńge. Alaman báıgede sóreden sýyrylyp alǵa shyqqan astanalyq «Alǵyr» kómbege jetkenshe aldyna qara saldyrǵan joq. Osylaısha, «Astana Motors» kompanııasynyń avtokóligi elordaǵa jol tartty. Qalǵan júldeli oryndarǵa da qarjylaı syılyqtar tabystaldy.
Osy kúni oblysta taǵy bir taǵylymdy shara ótti. Báıgeden el chempıonatyna irikteýmen qatar «Ulttyq kıim – ult ajary» atty oblystyq ulttyq kıimder baıqaýy uıymdastyryldy.
Baıqaýǵa qatysqan 53 qyz-kelinshek kıip shyqqan ulttyq kıimder dástúrge sáıkestigi, daıyndaý sheberligi men shyǵarmashylyq kózqaras turǵysynan baǵalandy. Birinshi oryn alǵan jeńimpazǵa – 500 000, ekinshi orynǵa – 300 000, úshinshi oryn ıesine 200 000 teńge tabys etildi.
Qazylar alqasyn basqarǵan Qazanǵap atyndaǵy Qyzylorda joǵary mýzykalyq kolledji dırektory Uljan Baıbosynova jeńimpazdardy quttyqtap, ulttyq murany ulyqtaıtyn osyndaı sharalardyń jıi ótkizilýine tilektestigin bildirdi.
QYZYLORDA