L.N.Gýmılev atyndaǵy Eýrazııa ulttyq ýnıversıtetinde Qyrǵyz tili men mádenıeti ortalyǵy ashyldy. Onda tildik jáne ádebı baǵyttar boıynsha oqytý qolǵa alynady. Sondaı-aq Osh memlekettik ýnıversıtetimen birlesken qos dıplom baǵdarlamasy júzege asyp otyr.
Saltanatty sharaǵa Eýrazııa ulttyq ýnıversıteti men Osh memlekettik ýnıversıtetiniń rektorlary Erlan Sydyqov pen Qudaıberdı Qojobekov, elimizdegi Qyrǵyz Respýblıkasynyń Tótenshe jáne ókiletti elshisi Dastan Dıýshekeev jáne eki eldiń ǵalymdary men oqytýshylary, stýdentteri qatysty.
– Bul – bizdiń negizgi seriktesimiz Osh memlekettik ýnıversıtetimen ǵylymı-akademııalyq yntymaqtastyq aıasyndaǵy baılanysty keńeıtýdegi mańyzdy qadam. 2019 jyldan bastap bizdiń oqý ornynda Qyrǵyzstannyń joǵary oqý oryndarynan 200-den asa óren ártúrli bilim berý baǵdarlamalary boıynsha oqydy. Ortalyqtyń ashylýy baýyrlas eki el arasyndaǵy yntymaqtastyqty odan ári nyǵaıtýǵa erekshe úles qosatynyna senimdimiz, – dedi Erlan Sydyqov.
Byltyr Qyrǵyz elinde L.N.Gýmılev atyndaǵy Eýrazııa ulttyq ýnıversıtetiniń fılıaly ashyldy. Búgingi tańda onda 30-ǵa jýyq qyrǵyz stýdenti bilim alady. Olar qazaq tili, aýdarma isi men ádebıet mamandyǵy boıynsha oqıdy.
– Bizdiń ýnıversıtetter arasyndaǵy yntymaqtastyq Qyrǵyzstan men Qazaqstan arasyndaǵy dıplomatııalyq qatynastardyń damýyna áser etedi. О́ıtkeni bilim – memleketter arasyndaǵy kópir. Biz úshin Eýrazııa ulttyq ýnıversıteti – Qazaqstandaǵy úzdik ýnıversıtet. Búgingi mańyzdy is-shara eki joǵary oqý orny arasyndaǵy dostyqqa serpin beredi dep senemin, – dep atap ótti Osh memlekettik ýnıversıtetiniń rektory Qudaıberdı Qojobekov.
Sonymen qatar elimizdegi Qyrǵyz Respýblıkasynyń Tótenshe jáne ókiletti elshisi Dastan Dıýshekeev eki memleket arasynda bilim berý salasynda kelisim bar ekenin jetkizdi. «Ortalyqtyń ashylýy bizdiń azamattarymyz, osynda oqıtyn stýdentter úshin sapaly bilim alýǵa jol ashady», dep atap ótti dıplomat.