Shaıbaly hokkeıden Qazaqstannyń jasóspirimder quramasy Fransııanyń Anje qalasynda ótip jatqan álem chempıonatynyń ekinshi kezdesýinde de jeńiske jetti.
Alǵashqy týrda Majarstan hokkeıshilerin 3:0 esebimen tize búktirgen jerlesterimiz ekinshi týrda «A» tobynda Qazaqstanmen birge týrnır kestesinde kósh bastaǵan Japonııa jasóspirimderin qapy qaldyrdy. Esep – 5:0. Matchtyń birinshi kezeńinde Qazaqstan quramasynan Artýr Gross oıynnyń esebin ashsa, úzilisten keıin Kırıll Lıapýnov Japonııa qaqpasyna ekinshi shaıbany soqty.
Úshinshi kezeńde de bul esep Qazaqstan hokkeıshilerin qanaǵattandyrǵan joq. 44-mınýtta Aleksandr Kım tablodaǵy kórsetkishti 3:0-ge jetkizse, arada tórt sekýnd ótkende Kırıll Lıapýnov dýbldiń avtory atandy. Al matchtyń aıaqtalýyna bir mınýt qalǵanda Ádil Beısembaev mergendigimen kózge túsip, matchtyń sońǵy núktesin qoıdy – 5:0. Jerlesterimiz chempıonattaǵy keıingi oıynyn búgin Danııa hokkeıshilerimen ótkizedi. Olar alǵashqy týrda Japonııadan 5:3 esebimen jeńilgen bolsa, ekinshi týrda Ýkraına quramasyn jeńdi – 5:1. Ekinshi týr oıyndarynan keıin týrnır kestesinde Qazaqstan quramasy alty upaımen jeke-dara kósh bastady.