Bıyl elimiz boıynsha ár tórt jylda bir ret ótkiziletin Qazaqstannyń VI jazǵy spartakıadasy uıymdastyrylyp jatyr. Jyl basynan beri sporttyń kúres, taekvondo, ústel tennısi, semserlesý jáne velosport túrlerinen el úzdikteri anyqtaldy. Al kúni keshe sporttyq gımnastıka sportshylary saıys alańyna shyqty. Alataý baýraıynda ótken elishilik dodada ádettegideı ulttyq qurama ulandary óz myqtylyǵyn dáleldep, jeńis tuǵyrynan kórindi.
Bes kúnge jalǵasqan básekede sportshylar erler jáne áıelder arasyndaǵy kópsaıys jáne jekelegen bórene, erkin jattyǵý, bıiktiktegi qossyryq, tirek sekirý syndy jattyǵýlardy oryndap, árqaısysynan upaı jınady. Sóıtip, eń kóp upaı jınaǵan sportshylar Spartakıada jeńimpazy atandy.
Máselen, erler arasyndaǵy «Sport sheberleri» sanatyndaǵy básekede Tokıo Olımpıadasynyń qatysýshysy, Álem kýbogi jarystarynyń jáne Azııa chempıonattarynyń jeńimpazy men júldegeri, ulttyq qurama múshesi almatylyq Mılad Karımı barlyq saıysta 169,700 upaı jınap, óz myqtylyǵymen daralandy. Keıingi oryndarǵa Qazaqstan chempıonatynyń ár jyldardaǵy jeńimpazdary – Ilıas Azızov (Almaty, 160,183 upaı) pen Dıas Toıshybek (Shymkent, 154,526) jaıǵasty.
Al «Sport sheberligine úmitker» sportshylar arasynda 150,800 upaı jınaǵan pavlodarlyq Nurtan Ydyrysov top jardy. Ekinshi oryn shymkenttik Altynhan Temirbekke (148,616) buıyrsa, úzdik úshtikti taǵy bir pavlodarlyq sportshy Roman Hegaı (145,000) túıindedi.
Al 6 jattyǵýdan turatyn komandalyq kópsaıysta ulttyq qurama sportshylarynan jasaqtalǵan Almaty qalasy top jardy. Olar barlyǵy 1031,812 upaı jınady. Jeńimpazdan 16 upaıǵa az jınaǵan Shymkent qalasynyń gımnastary (1015, 579) ekinshi orynǵa taban tirese, qola medal Pavlodar oblysyna (942, 617 upaı) buıyrdy. Jekelegen syndarda ulttyq qurama múshesi Ilıas Azızov qarsylas shaq keltirgen joq. Ol 6 snarıadtyń tórteýinde altynnan alqa taqty.
Áıelder arasyndaǵy «Sport sheberleri» básekeleri óte tartysty ótip, jeńimpazdar tek sońǵy sátte ǵana anyqtaldy. Sheshýshi tusta qajetti upaıyn jınap úlgergen almatylyq Arına Lebedeva (99,480 upaı) az ǵana aıyrmashylyqpen Ámına Halımardennen (Astana, 99,335) basym túsip, chempıon atandy. Úzdik úshtikti Medına Kenenbaı (Almaty, 98,530) túıindedi.
Al «Sport sheberligine úmitker» gımnastar ishinde Medına Qapbasova (Qaraǵandy, 95,720 upaı) úzdik ónerimen tóreshiler kózine túsip, Spartakıadada jeńiske jetse, odan keıingi oryn Radmılla Tarasova (Almaty, 93,600) men Amelı Mýkýshevaǵa (Astana, 90,680) buıyrdy.
Qyzdar arasyndaǵy komandalyq kópsaıysta da Almaty qalasynyń gımnastaryna teń keler qarsylas tabylmady. Olardyń enshisinde – 604,022 upaı bar. Kúmis júldege Astana qalasynyń sportshylary ıe bolsa (589,605), úzdik úshtikti Abaı oblysynyń órenderi (557, 698) túıindedi. Aıta keteıik, komandalyq kópsaıysta ár óńirdiń atynan 6 sportshydan baq synady.
«Spartakıada kezinde biraz gımnast jaqsy ónerimen kózge tústi. Bastysy, olardyń kombınasııalarynyń negizi qalanǵan. Dese de olarǵa áli kóp jattyǵyp, tyńǵylyqty jumys isteý kerek. Keı tustarda olarǵa tájirıbe jetispeı turǵany anyq baıqaldy. Aldaǵy ýaqytta taǵy da shyńdala tússe, ulttyq qurama deńgeıine jete alady. Uzaq ýaqyt kósh bastap júrgen Almaty qalasynyń komandasyna bul joly Abaı oblysy men Astana qalasynyń gımnastary ájeptáýir qarsylyq kórsetti. El ishinde básekeniń bolǵany bárimizge jaqsy. Ulttyq quramaǵa keler bolsaq, osy jarystan keıin biz birden Kaırde ótetin Álem kýbogi kezeńine attanamyz. Ol jerde gımnastarymyz tabysty óner kórsetip, jankúıerlerdi qýantady degen senimdemin», deıdi sporttyq gımnastıkadan Qazaqstan quramasynyń bas bapkeri Nadıra Iýnýsova.