Túrkistan oblysyna Pavlodar, Shyǵys Qazaqstan, Soltústik Qazaqstan, Abaı oblystarynan arnaıy kelgen 76 maman birqatar aýdandy aralap, ár sala boıynsha bos jumys oryndaryn usyndy. Maqtaaral aýdanynda bastalǵan «Qonys aýdarý» jármeńkesi Saıram aýdanynda jalǵasyp, Túrkistan qalasynda qorytyndylandy. Úsh kúnniń ishinde 500 otbasy, ıaǵnı 2 myńǵa jýyq túrkistandyq teriskeıge kóshýge nıet bildirip otyr.
Bul baǵytta bıyl da 6 727 kvota bólingen eken. Qonys aýdarýshylar úshin memlekettik qoldaý kórsetetin Abaı, Aqmola, Qaraǵandy, Qostanaı, Pavlodar, Soltústik Qazaqstan, Ulytaý, Shyǵys Qazaqstan oblystary belgilengen. Bólingen kvota negizinde, jyl basynan beri Túrkistan oblysynan 34 otbasy qonys aýdarǵan. «Qonys aýdarý» jármeńkesi aıasynda turǵyndarǵa qonys aýdarǵan jaǵdaıda kórsetiletin áleýmettik kómekter, kóshý shyǵyndaryn óteý baǵdarlamalary týraly aqparattyq-túsindirý jumystary júrgizilip, 4 óńir boıynsha barlyǵy 3 934 bos jumys orny usynyldy.
Delegasııa ókilderiniń aıtýynsha, Soltústik Qazaqstan, Shyǵys Qazaqstan, Abaı jáne Pavlodar oblystarynda medısına, bilim, kólik, ónerkásip, qurylys, aýyl sharýashylyǵy salalary jáne ózge de baǵyttar boıynsha mamandar tapshy. Jármeńkede oblys turǵyndaryna usynylǵan salalar boıynsha soltústik aımaqtarda turaqty jumysqa ornalasýǵa múmkindik kóp ekeni aıtyldy. Qonys aýdarǵandar jumyspen qamtylýymen qatar, aýyl sharýashylyǵy jáne egin sharýashylyǵymen aınalysý úshin jer alyp, óz isterin asha alady. Munan bólek, azamattardyń áleýmettik turmys jaǵdaıyna da erekshe mán berilip, túrli qoldaýlar jasalady. Máselen, qonys aýdarýǵa otbasynyń árbir múshesine 70 AEK, ıaǵnı 241 500 teńge mólsherinde materıaldyq kómek beriledi. Turǵyn úıdi jalǵa alý men kommýnaldyq qyzmetter aqy tóleý jóninen shyǵystardy óteý boıynsha aýyldyq jáne qalalyq jerlerge qonystanýyna qaraı kómek kórsetiledi.
Aıta ketelik, «Qýatty óńirler – el damýynyń draıveri» jobasy aıasynda Túrkistan oblysynan jumys kúshi jetispeıtin soltústik aımaqtarǵa 2015-2022 jyldar aralyǵynda 11 892 adam kóshken. Byltyr respýblıka boıynsha bólingen 6 587 kvotanyń 32,3 paıyzy Túrkistan oblysynda ıgerilip, 2021 adam qonys aýdarǵan bolatyn.
Túrkistan oblysy