Mádenıet jáne sport mınıstrliginiń bastamasymen elorda irgesinde «Bozoq» memlekettik tarıhı-mádenı mýzeı-qoryǵy salynyp jatyr. 412 gektar aýmaqty alyp jatqan keshen elimizdegi eń úlken ashyq aspan astyndaǵy mýzeı bolmaq.
Qazirgi tańda mýzeı aýmaǵyna qos qaptaldan kirýge arnalǵan bıiktigi jeti metrden asatyn kireberis qaqpa men bekinis qabyrǵalarynyń qurylysy bastaldy. Kireberis pen bekinistegi munaralar sol kezeńdegi tehnologııa boıynsha arnaıy jasalǵan qurylys materıaldarymen qaptalady.
Jobanyń negizgi maqsaty – ashyq aspan astyndaǵy mýzeıde dala órkenıetiniń ozyq jetistikterin kórsetý. Munda Bozoq qalashyǵymen qatar, eneolıt dáýirinen orta ǵasyrlarǵa deıingi tarıhı keshenderdiń tarıhı rekonstrýksııasy boı kóteredi.
Ár keshende materıaldyq jáne rýhanı mádenıettiń qalyptasý tarıhy kórsetiledi. Olar – saraı keshenderi, ǵıbadathanalar, turǵyn úıler, metallýrgııalyq jáne qysh peshter, ustahanalar men sheberhanalar, qolónershiler oramy, ortaǵasyrlyq bazar, petroglıfter jáne taǵy basqalar.
– Búgingi jastar kózben kórip, qolmen ustaýǵa bolatyn aqparatty jaqsy qabyldaıdy. Jańa formattaǵy mýzeı olarǵa sol dáýirdiń atmosferasyn, halyqtyń turmysyn tolyq sezinýge jáne dala órkenıetiniń ozyq mádenıetimen tanysýǵa múmkindik beredi. Bul joba bolashaqta elimizdiń tanymal týrıstik brendteriniń birine aınalatyny anyq. Mýzeı-qoryq ashý týrızmdi damytýǵa múmkindik beredi. Elorda óńiriniń ınvestısııalyq tartymdylyǵyn jaqsartady. Elimizdiń Eýrazııa dalalyq tarıhynyń saqtaýshysy retindegi halyqaralyq ımıdjiniń ósýine oń yqpal etetin bolady, – dedi «Bozoq» memlekettik tarıhı-mádenı mýzeı-qoryǵynyń dırektory Sáýle Bóribaeva.
Bolashaqta ashyq aspan astyndaǵy mýzeı ınnovasııalyq joba retinde elordanyń ǵana emes, elimizdiń týrıstik kartasynda mádenı ınfraqurylymǵa aınalyp, shaǵyn jáne orta bıznesti damytý men jańa jumys oryndaryn qurýǵa serpin beredi dep josparlanǵan.