О́ńir turǵyndarynyń dinı saýattylyǵyn arttyrý maqsatynda Jambyl oblysy ákimdiginiń din isteri basqarmasy din salasynda jumys atqaratyn mamandarǵa arnalǵan oqytý semınaryn ótkizdi, dep habarlaıdy Egemen.kz.
Eki kúnge sozylǵan semınarǵa din salasyndaǵy aqparattyq-túsindirý toptarynyń músheleri, memlekettiń din salasyndaǵy saıasatyn iske asyrýǵa jáne dinı ekstremızm men terrorızmniń aldyn alýǵa múddeli jergilikti atqarýshy organdar men quqyq qorǵaý organdarynyń qyzmetkerleri, arnaıy jáne jalpy bilim berý uıymdarynyń muǵalimderi, dinı birlestikterdiń ókilderi qatysyp, 200-ge jýyq adam qamtyldy.
Semınarǵa «Nur-Múbarak» Egıpet ıslam mádenıeti ýnıversıteti, «Aqnıet» aqparattyq-nasıhattaý jáne ońaltý ortalyǵy» qoǵamdyq qorynyń dintanýshylary men oqytýshylary, psıhologtar, blogerler qatysyp, saladaǵy eń ózekti taqyryptarda dáris oqydy. Destrýktıvti dinı aǵymdardyń arbaý joldary men olardan tónetin qaýip-qater máselesine qatysty aıtylǵan paıymdy pikirler kóptiń kókeıine qondy. Sondaı-aq turǵyndardy, ásirese jastardy jat aǵym qursaýynan saqtaý máselesi de áńgime arqaýyna aınaldy.
Is-sharaǵa arnaıy shaqyrylǵan SMM mamandary da kókeıkesti oılaryn ortaǵa saldy. Lektorlardyń dáristeri tyńdalǵannan keıin qatysýshylar suraqtaryn qoıyp, mamandar tarapynan mazmundy jaýap aldy.
Semınarǵa qatysýshylar jergilikti atqarýshy jáne quqyq qorǵaý organdarymen birlese otyryp, destrýktıvti dinı aǵymdardyń aldyn alýda judyryqtaı jumylýǵa ýaǵdalasty. Aqparattyq-nasıhattyq toptardyń jumysyn jandandyrýdy biraýyzdan maquldady. Semınar sońynda qatysýshylarǵa sertıfıkattar tabystaldy.