Tarıhy tereńde jatqan bilim ordalarynyń qataryna Almatydaǵy Kúlásh Baıseıitova atyndaǵy daryndy balalarǵa arnalǵan respýblıkalyq mamandandyrylǵan mýzykalyq mektep-ınternatyn jatqyzýǵa bolady. Aty alysqa taraǵan oqý ordasynyń búgingi jaǵdaıyna qarap ta kóńil toıǵandaı.
Mektep-ınternat 1948 jyldyń qyrkúıeginde qurylǵan. Qazaqtyń bulbuly Kúlásh Baıseıitovanyń esimin este saqtaý maqsatynda bilim ordasyna 1957 jyly áıgili ánshiniń esimi berildi. Talaı talanttyń tomaǵasyn sypyrǵan mektep-ınternatta qazir 480 oqýshy bilim alady. Zamanaýı materıaldyq-tehnıkalyq baza otandyq ári sheteldik ujymdarmen shyǵarmashylyq baılanystar ornatýǵa jol ashyp otyr. Máselen, ınnovasııalyq kompıýterlik tehnologııalar garmonııa, solfedjıo, mýzyka ádebıeti sııaqty pánderdi oqytý kezinde qoldanylady.
– 1996 jyly elimizdiń túkpir-túkpirindegi talantty balalarǵa jan-jaqty bilim men tárbıege qajetti jaǵdaı jasalyp, kásibı daıarlyǵyn odan ári álemniń úzdik joǵary oqý oryndarynda jalǵastyrýǵa múmkindik berý úshin mektep respýblıkalyq mártebege ıe boldy. Bul rette oqý ordasynda basqa qaladan kelgen balalarǵa arnalǵan 110 oryndyq ınternat bar. Mundaǵy jatyn oryndar men bólmeler tıisti talaptarǵa, sanıtarlyq normalarǵa saı joǵary estetıkalyq deńgeıde bezendirilgen. Turmysqa da jaqsy jaǵdaı jasalǵan, – deıdi mekeme basshysy Baqtııar Ábdirashev.
Onyń aıtýynsha, mekteptegi mýzyka pánderiniń bilim dıapazony ártúrli bolyp keledi, ári oqýshylardy kásibı-ádistemelik qajettilikterin qamtamasyz etedi. Mekteptegi bilim kelesi arnaıy mamandyqtar boıynsha júrgiziledi: arnaıy fortepıano, ishekti aspaptar, úrmeli jáne urmaly aspaptar, halyq aspaptary, mýzyka teorııasy jáne kompozısııasy, hordy dırıjırleý. Oqýshylardyń kásibı daǵdysyn, oryndaýshylyq jáne sahnalyq sheberlikterin damytý úshin shyǵarmashyl ujymdar, ıaǵnı sımfonııalyq, kameralyq, halyq aspaptar, úrmeli, estrada-sımfonııalyq orkestr, hor, skrıpkashylar, dombyrashylar, vıolonchelıster, qobyzshylar jáne qylqobyzshylar ansamblderi uıymdastyrylǵan. Barlyq bólimde bilikti mamandar eńbek etedi. Olardyń qatarynda halyq ártisteri, eńbek sińirgen óner qaıratkerleri, Qurmanǵazy atyndaǵy Qazaq ulttyq konservatorııasynyń professorlary men dosentteri, halyqaralyq jáne respýblıkalyq konkýrstardyń laýreattary, bilim jáne mádenıet salasynyń úzdikteri bar. Ujymda kóp jyldan beri kópshilikke belgili, mýzykalyq qoǵamdastyq moıyndaǵan «Baıseıitova mektebiniń» dástúri, oqytý men tárbıeleýdiń birizdiligi qalyptasqan. Oqytýshylardyń 80 paıyzy – mekteptiń túlekteri.
– Ǵalymdar dáleldegendeı, mýzykamen aınalysqan adamdardyń mıynda erekshe neırondar paıda bolyp, oılaý qabiletine oń áser etedi. Sondyqtan qatań tańdaý men suryptaýdan ótken daryndy balalar osyndaı arnaıy mamandandyrylǵan mektepte oqyp, tulǵa bolyp qalyptasatyny anyq. Mundaı mektepte oqý – maqtanysh ári úlken jaýapkershilik. Sebebi oqýshylarymyz eki mektepti qatar ıgerip, erteden keshke deıin oqýdan bas almaıdy. Sabaqqa qatysýymen qatar jeke daıyndyǵy da óte kóp ýaqytty alady. Sol sebepti oqý ordasyn tolyq aıaqtaǵan túlekterimizdiń boıynda uqyptylyq, turaqtylyq jáne tabandylyq sekildi jaqsy qasıetter myqtap ornyǵady. Kerisinshe jaǵdaıda ondaı tulǵadan jaqsy oryndaýshy, mýzykant shyǵýy ekitalaı, – deıdi mektep-ınternattyń dırektory.
Bilim ordasy búginge deıin qıly-qıly kezeńderdi de bastan ótkerdi. «Qandaı kezeń bolsa da, mektebimiz áýelgi baǵytynan aýytqymady. Osy oraıda qıyndyqtardy eńserip, mekteptiń tutastyǵyn saqtaǵan, damýyna erekshe úles qosqan burynǵy dırektor Ohan Abdýllaevtyń eńbegin atap ótkim keledi. Búginde mektebimiz bıikten túspeı, kásibı mamandardy daıarlaý isin jalǵastyryp keledi. Túlekterimizdiń eldi aıtpaǵanda, sheteldiń ataqty oqý oryndaryna oqýǵa túsýi – bizdiń basty jetistigimizdiń biri. Olar teatr, kıno sekildi salalarda jemisti eńbek etip júr. Aıtalyq, Jámıla Serkebaeva, Álı Oqapov, Aıdos Saǵatov, Karına Abdýllına sekildi estrada juldyzdary bizdiń mektepte oqyǵan», dedi ol.
Jańabek TOIBAZAROV,
jýrnalıst
ALMATY