6-28 mamyr aralyǵynda Italııa tasjoldarynda velosporttan jyldyń eń iri úsh jarysynyń alǵashqysy – «Djıro d’Italııa» grand-týrynyń jalaýy jelbireıdi.
114 jyldyq tarıhy bar Apennın túbegindegi veloshabandozdar básekesine «Astana Qazaqstan» velokomandasynyń ókilderi de qatysady. Atap aıtqanda, Pıreneı túbegindegi dodada «Astana» sapynan osy jarystyń birneshe kezeńinde top jarǵan 37 jastaǵy brıtanııalyq veloshabandoz Mark Kevendısh, 24 jastaǵy ıtalııalyq Samýele Battıstella, 31 jastaǵy amerıkalyq Djo Dombrovskı, 29 jastaǵy ıtalııalyq Djannı Moskon, 24 jastaǵy otandasymyz Vadım Pronskıı, 39 jastaǵy ıspanııalyq Lýıs-Leon Sanches, 25 jastaǵy ıtalııalyq Krıstıan Skaronı, 27 jastaǵy taǵy bir ıtalııalyq veloshabandoz Sımone Velasko óner kórsetedi.
Úsh aptaǵa jalǵasatyn bıylǵy «Djıro d’Italııa» dodasy Adrııa teńiziniń jaǵalaýynda ornalasqan Abrýsso qalasynan bastalyp, 28 mamyrda Rımde óz máresine jetedi. Osy ýaqyt aralyǵynda veloshabandozdar Italııa men Shveısarııa aımaǵyndaǵy 3481,2 shaqyrym joldy júrip ótedi.