Elimiz BUU Bas Assambleıasynda uıymnyń Eýropa keńesimen yntymaqtastyq týraly qararyn qoldady. Atalǵan qujatta Reseıdiń Ýkraınaǵa basqynshylyǵyn synaıtyn tusy bar. Negizi, Qazaqstan eki eldiń arasyndaǵy qaqtyǵysqa beıtarap pozısııa ustanady. BUU qararyna qatysty Syrtqy ister mınıstrligi resmı túsinikteme berdi.
BUU-nyń atalǵan qararyna Qazaqstan, Qytaı, Armenııa, Grýzııa, Izraıl, Úndistan, Brazılııa jáne Túrkııany qosqanda barlyǵy 122 el daýys berdi. Rezolıýsııaǵa Reseı, Belarýs, Sırııa, Nıkaragýa jáne Soltústik Koreıa qarsy boldy. Al Tájikstan, О́zbekstan jáne Qyrǵyzstandy qosqanda 18 memleket qalys qaldy.
«26 sáýirde Nıý-Iorktegi BUU Bas Assambleıasynyń jıynynda «BUU men Eýropa keńesiniń yntymaqtastyǵy týraly» qarar qabyldandy. Atalǵan rezolıýsııany BUU 2000 jyldan bastap qabyldap keledi. Qujatta BUU-nyń óńirlik uıymdarmen yntymaqtastyǵy týraly aıtylatyn pýnkti bar. Búginge deıin osy bólim esh daýysqa salynbastan qabyldanyp keldi. Al osy jyly daýys berý ózgeshe ótti. Bıylǵy rezolıýsııanyń osy bóliginde «Reseıdiń Ýkraınaǵa jáne onyń aldynda Grýzııaǵa qarsy agressııasynan keıingi jáne Reseıdiń Eýropa Keńesindegi músheliginiń toqtatylýyna baılanysty BUU men Eýropa keńesiniń yntymaqtastyǵynyń nyǵaıýy týraly» degen sıtata bar. Osy boıynsha qujat avtorlary Irlandııa men Islandııa talqylaý kezeńinde reseılik áriptesterimen bir kelisimge kele almaı daýlasyp qalady. Sondyqtan Reseı delegasııasy osy paragraf boıynsha bólek daýys berýdi suraıdy. Nátıjesinde, 81 el jaqtap, 10 el qarsy daýys beredi, 48 el qalys qaldy. Osy qalys qalǵandardyń ishinde Qazaqstan bar», dedi SIM resmı ókili Aıbek Smadııarov brıfıngte.
Osylaısha, Qazaqstan eki uıymnyń – BUU men Eýropa Keńesiniń ustanymyn ǵana qoldady. Al Reseı men Ýkraınaǵa qatysty óz pozısııasynda qala beredi.