Kezdesý barysynda Qazaqstan fýtbolynyń áleýetin arttyrý, sondaı-aq balalar men jasóspirimder sportyn damytý máseleleri talqylandy, dep habarlaıdy Egemen.kz Aqordanyń baspasóz qyzmetine silteme jasap.
Qasym-Jomart Toqaev Djannı Infantınony FIFA prezıdenti laýazymyna qaıta saılanýymen quttyqtap, búkil álemde, sondaı-aq elimizde fýtboldyń damýyna qosqan ólsheýsiz úlesi úshin alǵys aıtty.
Memleket basshysy FIFA-men aradaǵy yntymaqtastyqty keńeıtý perspektıvasyna joǵary baǵa berdi.
– Sizdiń saparyńyz Qazaqstan fýtbolyn damytý turǵysynan óte mańyzdy dep sanaımyn. Álemde eń tanymal sport sanalatyn fýtboldy damytýda aýqymdy is atqaryp jatqanyńyzdy bilemin. Sizdiń eńbegińizdi qurmetteımiz jáne FIFA prezıdenti retinde qoldaımyz. Biz FIFA-men jáne jeke ózińizben yntymaqtastyqty nyǵaıta túsýge daıynbyz, – dedi Qasym-Jomart Toqaev.
Memleket basshysynyń aıtýynsha, Qazaqstanda 1 mıllıonnan astam adam fýtbolmen júıeli túrde shuǵyldanady. Búginde elimizdiń barlyq aımaǵynda 17 fýtbol ortalyǵy jáne 2 akademııa jumys isteıdi. Onda 7 myńnan astam bala jattyǵady.
Djannı Infıntıno FIFA-nyń úzdik halyqaralyq tájirıbesin bólisýge jáne Qazaqstandaǵy fýtboldyń damýyna atsalysýǵa daıyn ekenin aıtty.
– Elińizge birneshe ret kelgenmin, biraq FIFA prezıdenti retinde alǵash ret kelip turmyn. Osy sebepke oraı sizben kezdesip otyrǵanyma qýanyshtymyn. Bul tamasha eldegi árbir fýtbol jankúıeri sııaqty Siz de fýtboldy unatatynyńyzdy bilemin. Biz birlese otyryp, kóptegen aýqymdy isterdi atqara alamyz. Qazaqstan tek aımaqta ǵana emes, álemdik deńgeıdegi óte mańyzdy elge aınaldy. Qazaqstan – FIFA úshin senimdi seriktes. Biz birge jumys isteýmiz qajet. Sebebi osy eldegi, sondaı-aq basqa elderdegi qoǵamdy fýtbol arqyly biriktirý úshin múmkindik mol, – dedi Djannı Infantıno.