Shymkent qalasynda 16 jasqa deıingiler arasynda tennısten álem chempıonaty Azııa – Tynyq muhıt aımaǵy boıynsha irikteý týrnıriniń shırek fınalynda Qazaqstan jasóspirimder quramasy Taıbeı ókilderimen kezdesedi, dep habarlaıdy Egemen.kz.
Qazaqstan jasóspirimderi V tobyndaǵy sońǵy oıynda Azııadaǵy myqty quramalardyń biri – Japonııamen kezdesken edi. Buǵan deıin eki qurama da shırek fınalǵa joldama alǵan.
Bul joly jas otandastarymyz 0:2 esebimen qarsylastaryna ese jiberdi. Arıana Gogýlına 2,5 saǵatqa sozylǵan básekede Iаmomoto Hıkarıge jol berdi – 6:3, 5:7, 3:6.
Al Polına Slepsova Shıho Tsýdjıokıge jol berdi, esep - 6:7 (5:7), 4:6. Birinshi partııada Polına 2:5 esebimen jeńilip jatyp, tarazy basyn teńestirgen. Dese de, taı-breıkte jeńilis tapty.
Endi jerebe qorytyndysyna sáıkes Iаroslava Shvedovanyń shákirtteri shırek fınalda Taıbeı quramasymen oınaıdy.