Bolashaǵynan kóp úmit kúttiretin elimizdiń jas tennısshileri – Asyljan Arystanbekova men Dana Baıdáýlet Túrkııanyń Antalııa qalasynda uıymdastyrylǵan eresekter arasyndaǵy «ITF World Tennis Tour W15» jarysynyń fınalısteri atandy.
Juptyq synda óner kórsetken jerlesterimiz halyqaralyq týrnırdi sátti bastap, fınalǵa deıin alqynbaı jetti. Bas júldeni sarapqa salatyn básekede olar osy týrnırdiń úshinshi raketkasy retinde tirkelgen Nıderland ókili Merel Hoed pen ıtalııalyq tennısshi Mırıan Tonmen kezdesip, eki setke jalǵasqan matchta qarsylastaryna 4:6, 4:6 esebimen jol berdi.
«Team Kazakhstan» akademııasynyń aǵa bapkeri Irına Chıchmarevanyń aıtýynsha, bul – jerlesterimizdiń eresekter arasyndaǵy alǵashqy iri jetistigi. «Fınalda jeńilip qalǵanyna qaramastan, Asyljan men Dana bir apta boıy tabysty óner kórsetti. Sońǵy básekege deıin olar dodanyń ekinshi jáne tórtinshi raketkalaryn utty. Sondyqtan biz durys baǵytta kele jatyrmyz dep oılaımyn. Aldaǵy ýaqytta qatelikterimizben jumys istep, budan da bıik shyńdardy baǵyndyramyz», dedi I.Chıchmareva.