Bıyl qazaqtyń qaıtalanbas kompozıtory, kúıshi Qurmanǵazy Saǵyrbaıulynyń týǵanyna 200 jyl tolady. Osyǵan oraı Reseı Federasııasyndaǵy Astrahan oblysynyń dombyrashylary kompozıtordyń «Adaı» kúıin oryndap, Atyraý oblysyna chellendj joldady.
Reseıde turǵanymen, ulttyq ónerden tamyr úzbegen dombyrashylar bul kúıdi Qurmanǵazy kesenesiniń aldynda tartty. Dombyrashylardyń arasynda eresekter de, balalar da bar.
– Qazaqtyń uly kompozıtory, kúıshi, dombyrashy Qurmanǵazy Saǵyrbaıulynyń mereıtoıyna oraı chellendj bastaýdy jón kórdik. Biz – Astrahan oblysynyń dombyrashylary chellendjimizdi Atyraý oblysyna joldaımyz, – deıdi Qurmanǵazy atyndaǵy óńirlik mádenı ortalyǵynyń dırektory Amangeldi Ábilǵazıev.
Qurmanǵazy Saǵyrbaıuly Reseı Federasııasyndaǵy Altynjar aýylynda jerlengen. Bul aýyl Astrahan oblysynyń Volodar aýdanynda ornalasqan. Atalǵan aýylda turatyn qandastardyń qatary kóp.
– Altynjar aýylynda 2005 jyly Qurmanǵazy atyndaǵy óńirlik mádenı ortalyǵy ashyldy. Qazir atalǵan ortalyq Astrahan oblysyndaǵy mańyzdy mádenı jáne tanymal týrıstik nysandarynyń birine aınaldy. Bizdiń ortalyqqa alys-jaqyn shetelderden jyl saıyn 1000-ǵa jýyq adam keledi. Týrısterge Qurmanǵazy Saǵyrbaıulynyń, onymen zamandas bolǵan qazaqtardyń ómiri týraly maǵlumat beremiz, – deıdi Amangeldi Ábilǵazıev.
Onyń aıtýynsha, ortalyqtaǵy mýzeıde uly kúıshiniń shyǵarmashylyǵy men ómirinen syr shertetin túrli eksponat qoıylǵan. Ortalyq janynan qurylǵan «Samal» qazaq mýzykalyq ansambli men «Belyı gorod» orys mýzykalyq ansamblinde 40-qa jýyq adam jumys isteıdi. Deni – qandastarymyz, arasynda 25 dombyrashy bar.
Atyraý oblysy